Babaye, minor sikop sa Oplan Sita

CEBU, Philippines – Nadakpan sa kapolisan ang tulo ka durugista ug usa ka 17-anyos nga lalaki sa gipahigayong Oplan Sita sa Sitio Galaxy, Barangay Tanke, Dakbayan sa Talisay kagahapon sa kaadlawon.

Una nilang nasikop mao si Vanessa Paculaba, 26, taga Sitio Kilawan.

Ang hepe sa Talisay City Police Station, Supt. Marlu Conag, niingon nga daghan sila nga gisita ug gipapauli apan si Paculaba nakit-an nga nagbitbit og 71 ka gagmay nga pakete sa shabu nga balor og P16,756.

Nadakpan sab sa laing grupo ang duha ka lalaki nga nagsakay og motorsiklo nga nagbadhas-badhas sa may Sitio Kilawan.

Ang duha nailhan nga sila si Efril Fernandez, 27, ug Junmar Cabando, 24, pulos nagpuyo sa maong lugar. Nasigpatan ang shabu nga gidala sa duha diin nakuhaan og 20 ka gagmay nga pakete si Fernandez samtang 15 kang Cabando nga ang tanan balor og P8,260.

Sa laing bahin unom ka tawo nasikop ug nakuhaan og ilegal nga drugas sa may GK, Budlaan, bukirang bahin sa Dakbayan sa Sugbo kagahapon sa kaadlawon.

Ang nasikop mao sila Kem Berlly Sabanal, 31; Joselito Sabanal, 32; Dixon Joserm, 23; Hele Robin, 53; Lysandro Subing-subing, 31, ug Darwin Buquir, 27, taga Univille Subdivision, Barangay Kasambagan, kinsa nasakmitan og shabu nga balor sa dul-an sa P28 mil.

Samtang nadakpan ang managkapuyo nga pusher og shabu sa Sitio Intermedia, Poblacion, Borbon alas 2 pasado sa niaging kaadlawon atol sa piyesta sa kapilya.

Si Inspector Eddie Dalaguit, hepe sa kapolisan sa maong lungsod, niila sa mga dinakpan nga sila si Wendell Pono Abundao, 35, ug Juliet Layasan Mangubat, 37, pulos nagpuyo sa maong dapit. Ang poseur buyer nga polis maoy nagpalit og usa ka gamay nga pakete sa shabu nga dali nga gitunol sa babaye human sa pagdawat sa P500 nga marked money.

Human niini dali sila nga gidakop ug sa gihimo nga pagrekisa maoy nakuha ang dugang pang lima ka pakete sa shabu.

Sa Purok Kulo, Canjulao, Dakbayan sa Lapu-Lapu nadakpan sab ang pusher sa buy-bust operation sa kapolisan alas 5 pasado ang takna sa hapon niadtong niaging adlaw.

Si Senior Inspector Joey Bicoy, hepe sa Presinto 3 sa Lapu-Lapu City Police Office, niila sa nadakpan nga si Camal Camin Sura Limbona alyas Migo, 31, taga Sitio Langub, Poblacion sa maong dakbayan.

Nasakmit gikan sa dinakpan ang pito ka gagmay nga pakete sa shabu ug ang P1,000 nga marked money. (Rowena D. Capistrano ug Romeo T. Limpangog/GMR)(BANAT NEWS)