Niduwa og ‘laing team’ gipadakop

CEBU, Philippines — Bana ug kabit niini nga giingong kawani sa barangay ang gidakop human maaktohi nga naghilawas sud sa usa ka balay diha sa Barangay Taba-ao, sa Lungsod sa Tabogon niadtong Sabado sa gabii.

Sumala pa sa pasiunang imbestigasyon ni Senior Police Officer 1 Epifanio Comedido nga nireklamo diha sa ilang buhatan ang 51-anyos nga asawa batok sa gibuhat sa 49-anyos niining bana ug sa babayeng 46-anyos nga dako sab nga minyo.

Ang ginang nga naglain og balay sa nahisgutan gihapong barangay misumbong sa kapolisan nga nakit-an niya ang iyang bana ug ang kabit niini nga naghilawas sa sulod sa balay sa ginikanan sa lalaki nga nahimutang pipila lang ka metros gikan sa ilang panimalay.

Sumala pa nga nakadungog ang ginang og inagulo sa usa ka babaye ug lalaki diha sa balay sa ugangan mao nga gisusi kini sa ginang ug iyang nakita sa gingi ang naghubo niya nga bana ug nagpatong sa laing babaye nga naghubo usab ug ang duha nag-agulo.

Sa kapungot sa ginang, miadto kini sa police station ug nagpatabang pagsikop sa bana ug sa kulokadidang niini.

Tuod man, naabtan pa gyud sa mga mirespondeng mga polis ang duha nga nagtagay pa sa sayop nga lawasnong kalipay hinungdan nga sila gisikop.

Sumala pa ni Comedido, dul-an duha ka tuig nang dili maayo og relasyon ang magtiayon tungod sa pagpangabit sa bana. Mao usab kini rason nga nibuwag og pinuy-anan ang ginang apan magduawan gihapon kini sa balay sa ugangan.

Pasakaan og kasong adultery ang babayeng kasawo sa bana samtang ang bana pasakaan usab og kasong concubinage sa iyang asawa, matud pa ni Comedido. (BANAT NEWS)