Libre na ang pagtungha sa Talisay City College
CEBU, Philippines — Wala na’y bayranan pa ang mga tinun-an sa Talisay City College (TCC) sugod sa school-year 2019-2020. Kini human nalakip ang maong tunghaan sa mga State Universities ug Colleges nga gitagan-an og pundo sa nasudnong kagamhanan.
Si Kongresista Gerald Anthony “Samsam” Gullas maoy nangusog niini didto sa kongreso aron malakip sa state universities ang Talisay City College aron makabenepisyo ang mga tinun-an niini.
Matud ni Gullas nga dili lang tuition ang libre, kon dili, lakip na ang miscellaneous fees. “Education has always been my top priority kay mao kini ang nindot nga bahandi nga atong ikabilin sa atong mga anak,” matud ni Gullas.
Sa pagkakaron, aduna pa’y gamay’ng bayronon ang TCC, apan mao na kini ang katapusang tuig nga pabayron ang mga tinun-an.
Ang TCC mao lang ang natugotan nga malakip sa nasudnong pangagamhanan nga mahatagan og pundo pinaagi sa Commission on Higher Education (CHED).
Sigurado si Gullas nga bisan og gamay ra ang bayronon sa TCC, apan may mga tinun-an gihapon nga maglisud pagbayad sa tuition fees.
Samtang si Dr. Richel Bacaltos, presidente sa TCC, niingon nga dako kini og bentaha sa mga Talisaynon ug sa katawhan nga namuyo sa unang distrito.
Malaumon si Bacaltos nga pahimuslan unta sa mga tinun-an ang kaayohan aron ilang makab-ot ang ilang mga damgo, pinaagi sa libreng edukasyon. (/RUB)(BANATNEWS)
- Latest
