Mayor Esgana gikiha

CEBU, Philippines – Gikiha ngadto sa Office of the Ombudsman og kasong administratiba ug criminal ang mayor sa lungsod sa Sta. Fe isla sa Bantayan nga si Mayor Jose Esgana tungod sa giingong pag-aresto sa usa ka tawo nga walay igong rason ug pagpadayag og bakak nga pamahayag aron nga mapriso ang usa ka residente sa Sta. Fe.

Ang abogado ni Vicente Illustrisimo nga si Atty. Judiel Pareja maoy niduso sa reklamo ngadto sa Office of the Ombudsman pagpasaka og kaso batok ni Esgana sa kasong upat ka kasong administratiba; Conduct Unbecoming of a Public Officer, Oppression o Grave Abuse of Authority, Grave Misconduct ug Kalapasan sa RA 6713 o ang Code of Conduct and Ethical Standards for Public Officials and Employees.

Samtang kasong criminal sama sa unlawful arrest, perjury ug kalapasan sa RA 3019 o ang Anti-Graft and Corrupt Practices Act ang gipasaka batok ni Esgana.

Sa affidavit nga gisumiter sa kampo ni Illustrisimo ngadto sa Ombudsman gisaysay nga giaresto ni Esgana si Illustrisimo niadtong Mayo 14.

“Mayor Esgana arrested my client after Willy Zonio informed him that he was intimidated by my client. Clearly, the same does not fall in any of the circumstances that allows arrest without warrant,” sigon ni Pareja sa iyang manifestation ngadto sa Ombudsman.

Sa complaint affidavit usab ni Illustrisimo iyang gisaysay nga niadtong Mayo 13 ang iyang pag-umangkon nga si Ramon Illustrisimo  gihulga sa mga sakop sa anak sa mayor.

Si Illustrisimo kasamtangang barangay treasurer sa Talisay Sta. Fe miangkon nga siya supporter sa kaatbang pagka- kapitan sa barangay nga anak ni Esgana.

Sa nanggawas nga report sa mga pamantalaan ang kampo ni Esgana una nang nipasaka og kasong grave coercion ngadto sa Provincial Prosecutor’s Office batok ni Illustrisimo kay nanghulga sa botante atol sa eleksyon.

Si Esgana nagkanayon nga hagbay ra nila gipasakaan og kaso si Illustrisimo  tungod sa paglapas sa Omnibus Election Code tungod sa pagbabag sa mga botante nga makabotar. Si Illustrisimo adunay party anang adlawa ug maagian sa mga tawo padung sa voting center ang ilang tent nga gikahimutangan.

Apan sa affidavit ni Illustrisimo siya nisaysay nga niadtong Mayo 14 adlaw sa eleksyon kalit lang nga miabot sa Esgana ug mikompronta kaniya ug dayon giaresto siya niini ug gidala sa Sta. Fe Police Station. (/IBM)(BANAT NEWS)