Pagputol sa kuryente sa CCNSHS wa gidayon

CEBU, Philippines – Mahuwasan na ang mga tinun-an ingon man mga magtutudlo sa Cebu City National Science High School human ang Visayan Electric Company nihiklin sa pagputol sa ilang linya sa kuryente kagahapon.

Kini bisan ang tunghaan wala pa kabayad sa P369,984.23 nga bayrunon sa kuryente sa milabay nga tulo ka buwan.

Nagpadayon ang klase sanglit ang VECO niuyon nga huwaton ang tunghaan nga makabayad tungod kay ang Department of Education-Cebu City Division ug kagamhanan sa siyudad nipadayag sa ilang intensiyon nga motabang sa eskwelahan.

“We are trying to discuss the possibility of settling down so that the services will not be affected because we don’t like to disrupt the instruction in the use of gadgets and other technologies that would enhance the teaching learning,” sigun sa principal nga si Evelyn Pielago.

Sa pamahayag sa VECO kini niingon nga ang tunghaan dunay lima ka accounts nga nagkantidad og P544,249.69.

Niadtong Lunes mao unta ang pagputol sa kuryente sa tunghaan apan ang management nipirma og promissory note nga naglatid nga ilang i-settle ang P369,984.23 nga wala nabayri sulod sa 24 oras.

Apan dayunon sa VECO ang pagputol sa kuryente sa tunghaan kun ang bayrunon dili ma-settle sunod semana.

Nakigkita si DepEd-Cebu City Assistant Superintendent, Dr. Danilo Gudelosao, sa management sa CCNSHS aron pagsulbad sa maong problema.

Kini niingon nga ang division office ug ang school management nagkauyon nga dili una mogamit og electric water dispenser.

Niuyon si Pielago kang Gudelosao ug dunay inventory sa tanang gadgets ug IT equipment nga naa sa tunghaan aron matuki kun unsaon nga makadaginot sa kuryente.

Asoy sa principal nga dunay laing cost-cutting measures nga buhaton aron maminusan ang konsumo sa kuryente.

Sigun ni Pielago nga ang tunghaan ni-increase sa ilang electricity consumption tungod sa ilang pag-upgrade sa technology aron pag-cater sa demand sa 21st century learners ug sa pagpatuman sa K-12 program.

Nidugang kini nga ang tunghaan mohangyo sa VECO alang sa inspection aron pagsusi kun duna bay illegal tapping sa kuryente gikan sa mga residente nga duol sa tunghaan tungod sa nagkataas nga bayrunon matag buwan.

Sa iyang bahin, si Konsehal Joy Augustus Young niasoy nga ang siyudad andam kanunay motabang sa tunghaan labot niini.

Sa mga nilabay nga katuigan ang siyudad maoy nagbayad sa bills sa tanang public schools apan gi-disallow kini sa Commission on Audit (COA).

“Among tabangan ang Science High pero mao gihapong estoryaha, we want to know nganong taas gihapon ilang bill pag-summer,” matud ni Young. (/GMR)(BANAT NEWS)