Polis gipatay sa Toledo
CEBU, Philippines – Laing polis nga gikatahong nalambigit sa ilegal nga drugas ang gipusil ug gipatay didto sa Barangay Daanlungsod, Dakbayan sa Toledo niadtong Martes sa gabii.
Hangtud karon wala pa gyud mailhi kon kinsa ang mipatay ni PO2 Melchizedek Batomalaque, 37, taga Toledo City nga nadestino sa Autonomous Region in Muslim Mindanao.
Sa pasiunang imbestigasyon, nasayran nga nagmaneho sa iyang motorsiklo si PO2 Batomalaque gikan sa ilang panimalay dihang siya gipusil sa wala hiilhing tawo.
Ang biktima nga naigo sa dughan ug ulo dali nga gidala sa Toledo City Hospital apan gideklarar nga patay na. Gimandoan ni Police Regional Office (PRO)-7 Director Debold Sinas ang Cebu Provincial Police Office nga maghimo og special investigation task group nga moimbestigar sa hitabo.
Matud ni Provincial Police Director Manuel Abrugena nga gawas sa anggulo nga may personal nga kabingkil ang biktima, gitan-aw usab nila ang ubang anggulo.
Si Batomalaque niuli sa Toledo gikan sa Mindanao aron motambong og hearing sa kaso sa hukmanan kay siya nadestino kaniadto ubos sa CPPO sa wala pa ibalhin sa Mindanao.
Matud ni Sinas nga nakadawat sila og report nga si Batomalaque naapil sa listahan sa mga “narco cop” ni Presidente Duterte ug gipanid-an nila ang mga kalihokan.
Nadestino kaniadto si Batomalaque sa Toledo City Police Station, dayon sa Pinamungajan Police Station sa wala pa gilabay sa Mindanao.
Ang ubang polis nga nalakip sa “narco list” ug gipatay mao sila si Senior Inspector Raymond Hortezuela nga napusilan atol sa buy-bust operation sa Mandaue City, ug si PO3 Jonathan Tilos, nga gipatay didto sa Alegria sa miaging semana. (/RUB)(BANAT NEWS)
- Latest
