CICC himoong ‘Infinite City’ Romeo T. Limpangog

CEBU, Philippines — Mahimo na unya nga “world class tourism magnet” ang Cebu International Convention Center sa Dakbayan sa Mandaue nga gitukod atol sa pagpahigayon sa Asean Summit niadtong 2007.

Kini sa higayon nga mahingpit na unya ang kaugmaran isip “Infinite City” nga gilauman nga mahuman sulod sa tulo ka tuig.

Nunot sa gipakitang tinguha sa Millennium Pan-Asia Hotel and Resort, Inc. nga pag-ugmad niini nga nagdesinyo alang sa pagkabig sa 360,000 ka turista nga mobisita sa matag tuig sa dakbayan nga makahatag og daghang kahigayunan nga kasudlan og trabaho.

Si Justin Xiao nga maoy chief executive officer sa Millennium Pan-Asia Hotel and Resort Inc. niingon nga ang pagaugmaron nga “Infinite City” ang langkuban sa duha ka hotels ug service apartments, grand casino, indoor theme park, cinemas,  pool garden, shopping centers ug mga buhatan nga anha ipahimutang sa sulod sa 15,000 metro kwadrado nga convention center.

Gihimo ang presentasyon sa maong mga magpapatigayon atol usab sa gipahigayon nga public hearing nga gitambungan sa mga opisyal sa kagamhanan sa dakbayan ug mga magpapatigayon niadtong niaging semana.

Naglambigit ang maong public hearing sa giduso sa konseho nga City Ordinance Number 14-2 017-1159 o ang “The Mandaue City Public-Private Partnership” nga nihaum usab sa katuyoan sa Millennium Pan-Asia Hotel and Resort, Inc. nga pag-ugmad  sa CICC ubos sa PPP.

“We decided to locate in Mandaue City because being the progressive industrial hub of Metro Cebu, it deserves a world-class tourism resort. In Mandaue, we will be the first,” pamahayag ni Xiao.

Matud ni Xiao nga mag-una sa paghatag og kahigayunan sa pagsulod og trabaho sa tukuron nga resort sa CICC kadtong mga kwalipikado nga mga Mandauehanon.

Dugang pa niya nga gawas sa paghatag og dakung kahigayunan sa panarbaho, ang tukuron nga edipisyo makahatag og dugang kita sa kagamhanan tungod kay dugang man unyang buhis ang makolekta niini.

Ang  CICC nga gitukod sa admi-nistrasyon ni kanhi gobernador Gwendolyn Garcia ang nakasinati og mga kadaut sa 7.2 magnitude nga linog ug bagyong Yolanda niadtong tuig 2013.

Ang sulod sa compound sa CICC nahimo nga temporaryong pinuy-anan sa mga molupyo sa Barangay Guizo ug Barangay Tipolo nga biktima sa sunog. (BANAT NEWS)