Mga proposals sa interesado Inayawan landfill tun-an

CEBU, Philippines — Ang Mott MacDonald, usa ka European-based consultancy firm nga gi-hire sa Asian Development Bank mosusi pagbalik sa gisumitir nga proposals sa nagkalain-laing kompaniya alang sa katukoran sa WTE facility sa kontrobersiyal nga Inayawan Landfill. Ang maong kompanya mahuman na sa ilang pagtuon sunod semana diin ang resulta maoy basihan sa pagpili og qualified proponent sa proyekto.

Ang maong firm misuse sa sitwasyon sa landfill alang sa pag-establisar sa waste to energy facility nga moproseso sa basura sa siyudad.

Kahinumduman, ang ADB mitagana og P40 million sa pagtuon sa Mott MacDonald diin ang team gipangulohan ni Katherine Stacey uban sa mga miyembro nga sila Luca Forlani, Ho Kok Yong, Toby Nugent, Pamela Chan ug Jose Sta. Ana.

Gi-review sa mga consultants ang broad economic, legal, technical, social ug environmental parameters sa proyekto.

Ang Incoming head sa Cebu City Environment and Natural Resources Office (CCENRO) Nida Cabrera miingon ang maong consultancy firm gilauman nga mag-consolidate sa ilang data labot sa pagtuon nga gihimo.  Nunot niini, ang siyudad makabutang og mga kondisyones sa terms of reference sa pag-acquire og posibleng proponent sa WTE facility.

“Next week expected mahuman ilahang study. With that maka-draft na’ta og TOR for the waste to energy facility,” asoy ni Cabrera.

Human ma-submit sa Mott MacDonald ang ilang report ang CCENRO uban sa Solid Waste Management Board mahimong mo-reevaluate sa proposal nga isumitir sa mga interesadong kompaniya.

Pipila sa mga private firms nga ni-submit sa proposals sa siyudad mao ang Best Trade Company, Metro Pacific sa Pangilinan Group, New Sky, NECO, JFA sa Yokohama, Western Power ug uban pa.

“After sila makasubmit sa proposal, i-submit nato sa council for approval authorizing the mayor to sign a contract with them,” dugang ni Cabrera.

Ang ADB motabang sa siyudad sa pagpili kon kinsa ang qualified proponent sa WTE facility.

Si Mayor Tomas Osmeña miingon ang consultant sa ADB maoy mangulo sa evaluation sa proposals sa mga nagkadaiyang firms. Matud sa mayor maayo sa City Government nga ang ADB mo-facilitate sa evaluation kay duna sila’y kaalam sa proyekto. Ang pagtukod og WTE facility sa landfill kabahin sa rehabilitation measures sa kagamhanan sa siyudad. (BANAT NEWS)