4Ps beneficiaries pasabton kabahin sa illegal drugs
CEBU, Philippines — Mopahigayon ang Cebu City Office for Substance Abuse Prevention (COSAP) og Information Education Campaign sa dul-an 10 mil ka mga beneficiaries sa Pantawid Pamilya sa siyudad aron mahibawo sila sa dili maayong epekto sa ilegal nga drugas.
Sigon sa pangulo sa COSAP Garry Lao nga iyaha kining ideya aron pagpalapad sa mga nabuhat sa ilang IEC batok sa illegal drugs.
Kahinumduman niadtong 2017 ang COSAP nagsugod sa ilang education campaign sa tanang tunghaan sa siyudad diin ilang gi-edukar ang mga tinun-an sa kadaot sa illegal drugs sa panlawas.
“So sila atong gi-target nasad ang parents. Nagtuo man ta nga ang mga ginikanan kinahanglan atong mapasabot unsa’y ill effects sa drugs,” asoy ni Lao.
Natuman kini human ang Department of Social Welfare and Development (DSWD) misanong sa ilang request nga ipaubos ang mga beneficiaries sa pantawid sa IEC.
Niadtong Hunyo 8, 2018 ang DSWD mipadala og suwat sa COSAP nga naglatid nga makig-alayon sila sa IEC.
Ang Pantawid usa ka national program nga naghatag og cash grants sa mga “poorest of the poor” aron pagpalambo sa health, nutrition ug education sa mga bata nga nag-edad og 0 ngadto na 18 years old.
Ang DSWD maoy lead government agency nga gitahasan sa pagpatuman sa maong programa.
Ang unang target nila mga ginikanan sa bukirang mga barangay. Nunot niini, inig Hunyo 19 ang mga beneficiaries gikan sa Tagbao ug Adlaon ang ilang unang subject.
Sa June 22 ang Guba ug Taptap ug sa June 26 mao ang Barangay Cambinocot ug Bacayan. Asoy ni Lao ang DSWD ang mi-set sa schedule.
Si Regional Program Director Racquel Enriquez mipadayag og suporta sa lakang sa COSAP. “Awareness in its totality and its effects of the illegal drugs legally and medically to them,” ni Enriquez pa. (BANAT NEWS)
- Latest
