Wala mailhing lalaki gipusil patay sa Talisay
CEBU, Philippines — Gipatay sa wala ilhing mamumuno ang usa ka lalaking gituohan nga mopalitay og ginadiling drugas didto sa Sitio Magay, Barangay Tanke, dakbayan sa Talisay kagahapon sa alas 3:20 sa kaadlawon.
Matud pa ni PO2 James Cabrillos, imbestigador sa Talisay City Police Station nga walay bisan usa sa mga nagpuyo sa lugar ang nakaila sa biktima.
Apan ang gipusil nagsul-ob kini og blue nga jersey nga ang numero 14 ug ang apelyedo nga “Canoy.”
Ang maong lalaki aduna’y gitas-on nga 5’5”-5’7” medium ang gidak-on sa lawas, mubo og buhok ug adunay tattoo sa iyang tuo nga abaga.
Asoy pa ni Cabrillos nga adunay nakadungan ang maong gipatay nga usa ka lalaki nga naglakaw sa lugar.
Apan sa dihang gipusil na ang biktima sa wala mailhing mamumuno mikaratil sa pagdagan ang kauban niini ug wala na mopatim-aw sa kapolisan.
Ang biktima naigo sa ibabaw nga bahin sa dunggan ug sa iyang suwang hinungdan sa hinanali niining kamatayon.
Giawhag sa kapolisan kadtong mga nawad-an og miyembro sa pamilya sa pagsusi ngadto sa punerarya sa St. Francis diha sa N. Bacalso Avenue sa Bulacao kay basin og mao kini ang ilang gipangita. (BANAT NEWS)
- Latest
