Doria posible nga magpabilin pa sa CCPO
CEBU, Philippines – Hayan nga malugwayan pa ang termino ni Cebu City Police Director Joel Doria kon ang kadagkoan sa kapolisan dili dayon makakita og tukmang pwesto nga iyang kabalhinan.
Si PNP chief Director General Oscar Albayalde mipasabot nga angay lang nga si Doria kahatagan og katungdanan nga mas taas sa iyang gihuptan karon, apan wala pa sila’y nakita nga bakanteng pwesto.
Dugay na nga si Doria nadestino sa pagka direktor sa kapolisan dinhi sa Dakbayan sa Sugbo ug bisan si Mayor Tomas Osmeña midayeg sa maayong pagkadumala ni Doria sa Cebu City Police Office.
Matud ni Albayalde nga basta ang usa ka opisyal maabtan og duha ka tuig sa iyang puwesto ug nindot ang iyang performance, gantihan gayud kini og mas taas nga katungdanan.
Si Doria misulod isip direktor sa CCPO kaniadtong Hulyo 2016, ug hapit na siya nga moabot og duha ka tuig, ug daghan siya og kalampusan sa kampanya batok sa gidiling drugas ug pakigbatok sa kriminalidad.
Tungod sa daghang kalampusan ni Doria, nahatagan siya og award isip usa sa napulo ka Outstanding Filipino sa Metrobank Foundation sa miaging tuig.
Gidasig ni Albayalde ang ubang kapolisan nga maningkamot gyud nga mapabilin ang kalinaw ug seguridad sa ilang Area of Responsibility kay usa kini sa iyang ‘qualifier’ aron dili marelibohan sa katungdanan.
“Let them show na ang kanilang AOR is really peaceful. We are not looking here na kapag may pinatay sila, meron silang na-recover.Hindi yun,” matud sa PNP Chief. (/RUB)(BANAT NEWS)
- Latest
