Emit gitangtangan na sa komitiba

CEBU, Philippines — Gitangtangan na gyud sa iyang komitiba sa urban poor sa Dakbayan sa Talisay si Konsehal Doroteo Emit ingon man ang iyang kota sa mga job order nga kawani.

Una niini temporaryong gikuha ang komitiba ni Emit samtang gihusay ang protesta sa pederasyon batok kaniya.

Matud ni Bucao nga desisyon kini sa konseho ug dili lang iyaha.

Hinoon anaa pay komitiba sa tourism ug business trade and labor si Emit nga sumala pa ni Bucao wala naglihok.

Si Emit sa iyang bahin niingon nga wala siya’y problema nga gihukasan sa komitiba sa urban poor apan ang komitiba sa tourism giingong gibabagan na siyang daan aron dili makalihok sa mga kalihukan.

Nagtuo sab si Bucao nga ang pagsupak ni Emit sa gusto ni Kongresista Gerald Anthony “Samsam” Gullas ug ni Mayor Eduardo Gullas nga dili pakontrahan ang ilang gituboy nga kapitan sa Barangay Pooc nga si Cuenco Manreal maoy hinungdan nga gikuha ang 20 ka kota niini sa job order.

Si Emit ang nipadagan gyud sa iyang asawa nga si Mila sa pagkakapitan apan naparot sa gituboy sa mga Gullas.

Si Emit nagkanayon nga wala siya’y problema nga gikuhaan sa kota apan unta tarungon siya sa pag-estorya dili kay ipasa-pasa lang sa laing departamento o kasaligan sa grupo.

Matud ni Bucao nga prebilihiyo ang kota nga naa kanila apan sa nahitabo ni Emit daw siya gisilutan sa partidong Alayon apan pabilin gihapon siya sa maong partido. Nanghinaut si Bucao nga dili siya pasanginlan ni Emit sa mga nadangatan niini.

“I can look straight to the eyes of Emit nga wa gyud ko nakigkontra niya,” asoy pa ni Bucao.

Apan si Emit nikatawa lang ug niingon nga nahibawo siya ni Bucao kay wala siya natawo kagahapon. (/GMR)(BANATNEWS)