“Protektor” ni Jaguar patay

CEBU, Philippines — Napusilan patay ang usa ka opisyal sa kapolisan nga giingong subject sa buy-bust operation sa mga kauban ra niyang polis human kini giingong misukol kanila niadtong Domingo sa gabii diha sa Barangay Tipolo, Dakbayan sa Mandaue.

Ang maong polis giila nga si Police Senior Insp. Raymund Hortezuela, 35, taga dalan JM Ceniza, Barangay Looc sa maong dakbayan. Gipahigayonan og buy bust si Hortezuela sa mga sakop sa Counter Intelligence Task Force Special Group Visayas (CITF SG) nunot sa impormasyon nga usa kini sa mga protektor sa namatay nga drug lord nga si Jeffrey 'Jaguar' Diaz.

Ang tigpamaba sa CITF nga si Police Chief Inspector Jewel Nicanor miingon atol sa press conference kagahapon nga sa dihang nahitabo ang transaksyon nakamatikod si Hortezuela nga mga operatiba ang iyang kasabot hinungdan nga miibot kini sa iyang armas apan siya ang napusilan.

Nakuha sa sud sa sakyanan ni Hortezuela ang usa ka kalibre .45 nga armas, 75 ka mga gagmay’ng triangular nga pakete sa gituohang shabu ug ang pito ka mga kabhang sa kalibre .45.

Sa dihang gisiksik og maayo ang Honda Blue nga sakyanan nga may plakang ZEH 663 nga giingong gidala ni Hortezuela nakaplagan ang PNP ID niini, laing usa ka .9 mm Glock sa likod sa maong awto.

Butyag ni Nicanor nga niadtong namugna ang ilang opisina niadtong Pebrero 2017, anaa nang daan sa ilang listahan si Hortezuela human makadawat og pipila ka mga intel report batok niini.

Ang CITF usa ka intelligence monitoring unit sa Camp Crame nga mitutok sa performance sa tagsatagsa ka mga polis isip parte sa internal cleansing sa PNP.

Kusganong gibarogan sa CITF ug sa Police Regional Office-7 nga lehitimo ang maong operasyon.

Sa susamang press conference, ang direktor sa PRO-7 nga si Chief Superintendent Debold Sinas mibutyag nga kanhi deputy chief si Hortezuela sa Guadalupe Police Station sa  Cebu City Police Office.

Apan gibalhin kini didto sa Negros Oriental Provincial Police Office niadtong Mayo 18, 2018 nunot sa mga nadawat nga mga intelligence report kabahin sa kalambigitan niini sa drugas.

“Of course, the PNP now we just don’t transfer without a cause,” si Sinas miingon.

Matud pa   nga gawas nga gikatahong protektor kaniadto ni Diaz ug tiggamitan og illegal nga drugas si Hortezuela, giingong mang-recycle usab kini og mga nasakmit nga mga drugas sa ilang estasyonan.

“There is already report na nag-link sa kanya. It so happen lang talaga na maingat at magaling siya. He was able to evade the drugs test, buy bust etc. Hindi lang talaga makunan ng ebidensiya until today. It takes time to catch him. Abtik maayo pud,” si Sinas miingon.

Sumala pa ni Sinas  “floating status” didto sa Negros Oriental si Hortezuela apan nananghid dayon kini sa direktor didto nga si Senior Supt. Raul Tacaca nga moari sa Sugbo aron motambong og court hearing sa Hunyo 8.

“Tacaca said, nananghid sa iyaha mobisita diri aron mo-attend og hearing niadtong June 8 pa. Siyempre gitugotan. However, gipapangita nako ang subpoena sa court, walay mapakita. Since June 8 pa siya naa diri,” si Sinas miingon.

“This will give a signal to all na dili lang criminal among i-project pati mga dautan nga polis. Kung di pa magbag-o, walay problema. This is a project to at least stop the involvement of the police,” bahad pa sa maong heneral.

Dugang niya nga aduna pay daghang proyekto nga ilang buhaton ug ang target mga polis nga nalambigit sa drugas ug badlungon sa katilingban. (BANAT NEWS)