16 sikop sa managlahing buy-bust

CEBU, Philippines — Nadakpan sa managlahing anti-drug operation sa kapolisan sa Dakbayan sa Mandaue, Dakbayan sa Danao ug Lungsod sa Compostela ang 16 ka tawo nga nagdala og shabu.

Si Senior Police Officer 1 Arnold Labine sa  Danao City Police Station niingon nga alas 3 pasado sa hapon sa niaging adlaw ilang nadakpan sa Sitio Cadastral, Looc,  Dakbayan sa Danao ang pusher og shabu nga si Anthony Nasubad, 22, kinsa nakuhaan og pito ka gagmay nga putos sa shabu.

Nadakpan sab  sa Pulang Yuta, Barangay Looc, ang pusher nga nagdala og shabu nga mao si Rovelyn Borja, 35; Raulito Yap, 48, nga taga Rotunda, Looc; Rolando Sabas, 41, ug Christian Mangubat, 25, taga Sitio Canlingo, Sabang sa maong dakbayan.

Nasakmit ang 37 ka gagmay nga pakete sa shabu ug P3,000 kapin nga gituohang halin sa pagpamaligya.

Samtang sa checkpoint sa kapolisan sa Presinto 1 sa Mandaue City Police Office (MCPO) sa may Zuelleg St, Centro niadtong Sabado sa gabii, 11 ka motorista ang nadakpan sa pagdala og shabu.

Si Police Officer 3 David Omambac niila sa nadakpan nga sila si Jerome Bacolod, 25; Michael Mallare Flores, 32, taga Pajac, Dakbayan sa Lapu-Lapu; Noel Depotario, 44, taga Lawis, Pasil, Dakbayan sa Sugbo; Joshua Tajanlangit, 18; Jade Cristal, 39, taga Mahayahay, Pasil, Dakbayan sa Sugbo ug Geo Daan Ecoy, 21, taga Tipolo, Dakbayan sa Mandaue.

Laing nadakpan mao sila si Daniel Bentulan Baring, 27, taga Sudtonggan, Basak, Dakbayan sa Lapu-Lapu; Roger Lao Matugas, 45, taga Guinacot, Dakbayan sa Danao; Jaime Añora Sayson, 28, taga Bohol-Bohol, Looc, Dakbayan sa Mandaue ug Charles Cantolita Medalle, 28, taga dalan Bonifacio, Tinago, Dakbayan sa Sugbo.

Atol sa maong checkpoint nasakmit ang 30 ka gagmay nga pakete sa shabu gikan sa mga dinakpan kinsa pulos luwan og motorsiklo.

Sa laing bahin usa ka Enrique Aton Llanto, 36, taga Sitio Riverside, Lawaan, Dakbayan sa Talisay, ang nakuhaan og tulo ka gagmay nga pakete sa shabu atol sa buy-bust operation sa Liloan Police Station. -/GMR (BANAT NEWS)