Jude Gabato Story

“Pasensya Lang Gyud”

CEBU, Philippines — Niagi siya og tumang kalisdanan ug pagtamay, apan wala gyud siya kawad-i og paglaum, hinuon niasdang siya ug nakigbatok sa mga pagsulay. Niya pa, tanang suliran nga moabot sa atong kinabuhi  adunay igong rason nganong nahitabo kini, ug mao kini ang paglig-on sa atong kaugalingon aron makab-ot ang kalamposan.

Kini sigon pa sa usa ka make-up artist nga si Jude Gabato, 28 anyos, kinsa lumad nga taga Englis, V. Rama dakbayan sa Sugbo. Gipanag-iya niini ang sikat nga Jude Gabato Salon nga nahimutang sa V.Rama ug Banilad.

Bata pa lang, siya na ang gisaligan sa iyang mga ginikanan sa pagbuhi tibuok pamilya. Ikalima siya sa pito ka managsuon. Nagtrabaho lang isip crew sa opisina sa Boy Scout of the Philippines iyang amahan ug housewife lang iyang inahan.

“Isang kahig, isang tuka. Nakasuway me anang kan-on butangan lang og asin ug tubig-init ug kanang butangan og patis ug mantika,”tug-an niya sa Banat News Tingusbawan.

Nagtungha siya sa Cebu City Central Elementary School diin kanunay siyang malakip sa top sa klase ug president sab siya sa ilang section.

Matag Sabado, maninda si Jude og saging, kamote ug bisan unsang pagkaon sa kadalanan aron makatabang sa iyang mga ginikanan.

“Tuyokon na nako tibuok Englis. Akong panghuna-huna ato dili na bata, kon dili unsaon nako nga makatabang ko nilang mama,”niya pa.

Aron mahurot og kahalin iyang baligya, mosayaw siya atubangan sa iyang mga kustomer. Mamaligya sab siya og mga pagkaon sa ilang tunghaan aron aduna siyay pambalon. Ug tungod sa iyang kakugi, nilampos gyud siya sa elementarya nga with honors.

Nipadayon siya sa high school sa Abellana National School. Ug niining panahona mas nidako iyang responsibilidad sa iyang pamilya. Giataki iyang amahan ug nabaldado kini. Siya na lang ang nangitag kwarta aron makakaon sila ug makatungha iyang mga manghod.

“Ako gyud tanan, ngitag pagkaon, palit tambal ni papa, paeskwela sa akong mga manghod,”niya pa.

Nangita siya og mas dako nga kakitaan gawas sa pagpaninda og pagkaon sa eskwelahan ug kadalanan. Hangtod nga gitabangan siya sa iyang maguwang aron makatrabaho isip assistant sa usa ka make-up artist. Naglisod siya sa una pa kay wala man gyud siyay igong kaalam unsaon pag-make-up apan sa iyang pagpaningkamot nakat-on siya. Dili matod pa sayon ang iyang naagian sa iyang amo.

“Nakasuway kog sagpa, dukol, panamastamas, pakauwawan sa kadaghanan,”asoy pa niya. Iyang sweldo P150 lang ang adlaw kaniadto, apan nipadayon lang siya kay nag-apas siya sa iyang makat-onan sa iyang trabaho. “Nakita man gud nako nga diri akong path,”asoy niya.

Dili lang siya personal assistant kun dili nahimo sab siyang katabang sa balay sa iyang amo. Gikan sa iyang klase moderetso na siya sa balay sa iyang amo aron manglimpyo. Bisan asa sila maabot og make-up ug kadlawon na siya makauli sa ilaha busa kanunay siyang ma-late sa klase ug pirme siyang magduka. Apan bisan pa man, nigradwar gyud siya sa hayiskul ug nipadayon sa kolehiyo sa kursong BS-Development Communication sa Cebu Technological University.

Padayon iyang trabaho isip assistant sa make-up artist apan niining panahona kay magraket na siya og make-up hangtod nga nagkadaghan iyang mga kliyente.

“Dinhi wala nakoy tulog, maglabad akong ulo. Usahay mo-cutting classes ko para moraket lang ko aron makabayad sa tuition, makapalit og tambal ni papa ug makapalit og pagkaon sa amo,”niya pa. Nakatrabaho usab siya isip make-up artist sa mga hosts ug guests sa mga programa sa ABS-CBN Cebu.

Pag-abot niya og 2nd year, niundang siya og nagpokos na lang sa pagpangwarta ug pagpahuman sa iyang mga manghod.

Human sa lima ka tuig nga nagtrabaho sa usa ka make-up artist, nipahawa siya sa poder niini ug nagkaugalingon.

Disinuwebe anyos  pa lang siya apan daghan na siya og suki, hinungdan nga nakatigom ug sa nag-edad siya og 21 anyos nakaangkon na siya og sakyanan.

Niining panahona, dungan niyang gipatungha sa kolehiyo ang duha ka manghod. Nagkadako iyang gastohan busa nakahunahuna siya nga magtukod og salon aron adunay permanenteng kita.

Nikuha una siya og  Cosmetology sa Department of Manpower Development & Placement sa TESDA aron mapun-an iyang kaalam sa pagpagwapa.  Nagbasa sab siya og mga libro diin napatik ang mga estorya sa mga malamposong negosyante ug mga sekreto nila sa kalamposan.

Usa gyud ka tuig si Jude nga nangandam sa pagatukorong negosyo ug hangtod niadtong Hunyo 8, 2016 giablihan niya ang Jude Gabato Salon didto sa Banilad. Gipaambit ni Jude nga tunga sa milyon iyang gipuhonan sa maong negosyo. Gigamit niya ang iyang tinigom sa bangko.

Nisukod lang og 30 sq. meter iyang salon ug unom ra iyang mga trabahante sa bag-o pa.

Gipaambit niini nga nakahilak matod pa siya atol sa opening day sa iyang salon sanglit daghan naman kaayong kustomer.

“Na-overwhelmed gyud ko sa kadaghang tawo,”niya pa.

Dako usab siya og pasalamat sa Kahitas-an sanglit dali ra niya nabawi iyang puhonan  ug dagko na siya og kita sa salon. Ug aron madungagan iyang kaalam, nikuha siya og semi-permanent make-up course didto sa Manila sa International Academy for Aesthetic Sciences. Paghuman niini, giablihan niya ang ikaduhang salon sa Englis V. Rama, usa ka tuig gikan sa pag-abli sa unang salon.

Mas dako siya og gipuhonan niini kay mas dako man. Mas nailhan iyang salon ug daghan na sab ang mohangyo nga mo-franchise apan nagdumili una siya.

“Dapat hands-on ka, kung naa kay problema, i-fix dayon. Dapat genuine ka sa imong client, makigtsika ka, open ka, but dili sab ka burara, mangita man gyud na sila og desente,”niya pa.

Importante sab matod pa ang dili pag-undang sa pagkat-on og bag-ong butang. “I will not stop learning, mo-evolve gyud ang beauty industry,”niya pa.

Daghan na sab siya og nadawat nga pasidungog isip make-up artist. Niaging tuig lang, naangkon niya ang labing unang international award human nakadaog sa Eyebrow Embroidery and Micro Blading Competition. Gawas niini, nahimo na sab siyang official make-up artist sa mga sikat nga celebrities sa nasud sama nilang Sam Milby, Anne Curtis ug ubang ASAP stars. Usa sab siya sa nag-make-up sa mga kandidata sa Binibining Pilipinas ug sa Miss Universe candidates sa dihang nag-host ang nasud sa maong pageant.

Ug ang giisip niyang pinakadako nga kalamposan sa kinabuhi mao ang pagpahuman sa kolehiyo sa iyang duha ka manghod, diin gradwado na kini sa kursong education ug engineering.

“Among balay ato bahay kubo gyud, ang sawog kay kawayan, niya ang atop kay naay buslot. Dili na gyud ko mobalik atong kahimtanga,”niya pa.

Busa dako siya og pasalamat sa naagiang pagsulay kay mao kini naghatag kaniya og pagtulon-an sa kinabuhi.

“Tanan nimong naagian kay naa gyud nay purpose, mabati o manindot, naa kay makuha nga lesson ana. Patience lang, dili ka magdali,” pamunto pa niya.

“Dili lang gyud ta mawad-an og paglaom, ayaw hunahunaa nga babag ang kalisod sa imong kalamposan, naay purpose nga nahitabo na,”panapos pa niya.