Hantak sa buwangan gironda, 4 sikop

CEBU, Philippines – Gisikop ang upat ka tawo nga naghantak sulod sa buwangan sa Aznar Sports Complex sa Tabunok, Dakbayan sa Talisay niadtong Miyerkules sa hapon.

Si Supt. Marlu Conag, hepe sa kapolisan sa siyudad, nipasabot nga legal ang buwangan apan ang pagduwa sa hantak ang gidili hinungdan nga gihimo nila ang pagpangronda. Ang mga dinakpan mao sila si Dionisio Ubod Jr., 60, taga Lower Mohon sa maong siyudad; Editha Regis, 40, taga Dumlog; Romulo Gabaca, 68, taga San Roque, ug Milwin Taran, 29, taga Lower Pakigne, Minglanilla.

Matud ni Conag nga nakadawat sila og taho labot sa ilegal nga kalihukan sa maong buwangan hinungdan nga ilang girumbo ug nasikop ang upat. Ilang nasakmit ang tulo ka tag piso nga gamit sa panalang, sementadong antogan ug kwarta nga moabot sa P1,873.

Samtang gisikop sab sa kapolisan ang lima ka tawo nga naaktohan nga naghantak sa Zone Lato, Kalawisan, Dakbayan sa Lapu-Lapu alas 4 pasado sa hapon sa niaging adlaw.

Si Senior Police Officer 1 Rodrigo Inoc sa Presinto 3 sa Lapu-Lapu City Police Office, niila sa mga nadakpan nga sila si Dean Mark Amoin Rojo, 27, ug Jon Kenno Amoin Rojo, 22, nagpuyo sa maong dapit.

Dugang nadakpan mao sila si Edson Amoin Delos Santos, 39, taga Purok Kasag, Kalawisan sa maong dakbayan. Nadakpan sab ang lain pang duha ka sugarol og hantak nga wala na kalihok dihang kalit kining gihamagan sa mga polis. Nakuha gikan sa mga dinakpan ang tulo ka sinsiyo nga ilang gihimong panalang ug ang nahibilin nga P300 nga sinsiyo nga pusta atol sa pagpanagan sa mga sugarol. (Romeo T. Limpangog/GMR)(BANAT NEWS)