Kontrabando nasakmit sa BOC

CEBU, Philippines – Minilyon ka pesos nga balor sa mga kontrabando ang gibuksan kagahapon sa buntag nga gipangulohan mismo ni Bureau of Customs Commissioner Isidro Lapeña, sa Cebu Port Authority.

Upat ka mga motor nga gilangkoban sa pang motorcross ug big bikes, lakip sa duha ka bisikleta nga gideklarar nga gamit sa balay apan sa pagbukas sa gisudlan niini mga motor, surf board, snowboards ug uban pa nga gamit ang sulod niini.

Laing container van nga ang gibutang mga piyesa sa excavator ang nakadeklarar apan sa pagbukas niini dili lang mga parte sa excavator apan apil na ang kinatibuk-an niini nga kagamitan nga mokabat gihapon ug minilyon ka pesos apan gideklarar lang nga nagkantidad kini og P72 mil ang taxes sa nagpadala niini.

Kining pag-abli sa mga kadudahang container vans kabahin kini sa kampanya sa BOC batok sa smuggling tungod kay alkanse kanunay ang gobiyerno sa buhis nga unta makolekta gikan niini.  Dugang pa ni Lapeña, gisusi ang mga consignee ug brokers sa maong mga kontrabando diin masuspenso gayud ang ilang accreditation.

Ang mga kwestyonableng container vans isyuhan og warrant of seizure and detention kon mapamatud-ang nanikas kini. (/IBM)(BANAT NEWS)