P3.2M danyos sa humayan sa Asturias

CEBU, Philippines — Moabot sa P3.2 milyones ang kantidad sa kadaut sa mga pananum nga humay sa duha ka barangay sa Lungsod sa Asturias.

Ang 54 ka ektarya sa pananum nga humay ang naapektuhan sa tungro virus sa Barangay Lunas ug Bago nga niresulta sa pagdeklarar og state of calamity sa maong mga rice producing barangays.

"Totally damage gyud siya, katong rice areas sa duha ka barangay nga identified sa municipal agriculturist," matud ni Dr. Roldan Saragena, ang provincial agriculturist sa Sugbo.

Giingong unom na ka buwan nga nag-antos ang mga mag-uuma tungod sa maong virus nga dala sa green leafhoppers.

Si Saragena nagkanayon nga usa sa rason kun nganong nagpadayon og katap ang maong virus gumikan kay sige lang og balik-balik ang "seeds" nga gigamit sa mga mag-uuma.

"Mao toy naka-triggered nidaku ang infestation sa rice tungro katong seeds nga gibalik-balik for a long time," matud ni Saragena.

Gisugyot karon sa Provincial Agriculture's Office ngadto sa mga mag-uuma nga apektado nga sa sunod dili lang una motanum og susamang klase sa humay.

"I-change crop nato, legumenous nga mga pananum aron maulian ang yuta, at the same time, ma-cut ang cycle ang virus," matud ni Saragena.

Gisugyot usab ni Saragena nga magdungan og pananum ang mag-uuma sa maong dapit.

Dili mominus 66 ka mag-uuma sa Barangay Lunas ug Bago ang apektado sa pagkatap sa maong virus.

Matud ni Saragena nga ila sab susihon sa maong mga mag-uuma ang na-cover sa Philippine Crop Insurance nga mamahimong makadawat og insurance sa dili mominus P15 mil matag ektarya nga nadaut sa tungro virus. (BANAT NEWS)