Kabomberohan palitan og bag-ong kagamitan

CEBU, Philippines — Mga bag-ong kagamitan alang sa kabomberohan ang gitinguha karon nga paliton alang sa modernization program sa Bureau of Fire Protection sa tibuok   rehiyon.

Kini ang gitug-an ni Department of the Interior and Local Government OIC-Secretary Eduardo Año atol sa iyang pakigpulong sa awarding ceremony atubangan sa mga sakop sa kabomberohan, fire volunteers, rescue group ug mga pribadong sector niadtong Biyernes sa hapon dinhi sa Sugbo.

Matud ni Año nga  adunay P1 bilyon nga inisyal nga gitagana alang sa ilang modernization program diin ipamalit kini og mga bag-ong fire trucks, truck ladder alang sa pagtubag og mga alarma sa mga high rise nga building,  mga breathing apparatus,  boots ug fireproof coat.

Kahinumduman nga usa ka dakong mall ang nasunog niadtong milabay’ng buwan sa Enero diin usa sa mga hagit sa kambomberohan ang pagsaka sa ibabaw kaayo nga bahin sa building aron pagpatay sa kayo.

Gitug-an ni Año nga ang maong mga kagamitan dako unya kini og tabang sa mga kabomberohan tibuok nasud.

Samtang si Senior Superintendent Samuel Tadeo, rehiyonal nga direktor sa BFP-7 nitug-an nga ang ilang ulohan nga buhatan mao na’y nag-program sa mga kagamitan nga pamaliton ug magpaabot na lang sila kung unsa’y moabot dinhi sa Sugbo. (/BDB)(BANATNEWS)