RTWPB-7 nituki na sa usbaw sa suhulan
CEBU, Philippines — Nagsugod na ang Regional Tripartite Wages and Productivity Board-7 sa pagtuki sa petisyon alang sa usbaw sa suhulan sa Central Visayas una pa sila mopagawas sa desisyon.
Kini ang gibutyag sa direktor sa Department of Labor and Employment-7, Alvin Villamor, kinsa mao sab ang pangulo sa RTWPB-7.
Napahigayon na ang upat ka public hearing sa lainlaing lugar ug nagpadayon ang pagsusi sa regional economic conditions nga ipresentar sa nagkadaiyang government agencies nga gikonsulta sa RTWPB kung aduna bay usbaw o wala.
Ang mga ahensiya gilangkuban sa Philippine Statistics Authority, Department of Trade and Industry, National Economic and Development Authority, ug DOLE.
Dugang pa ni Villarmor nga ang ilang buhatan nihatag og updates may kalabutan sa labor situation sa Central Visayas lakip ang compliance sa Minimum Wage Law.
Gitug-an ni Villarmor nga moagi sa makuti nga pagtuki sa RTWPB ang petisyon tungod kay dili lang ang panginahanglanon sa mga trabahante ug pamilya ang ilang gilantaw apan lakip na ang kapasidad sa mga magpapatigayon nga mobayad sa suhulan sa ilang mga tawo.
Ang desisyon sa RTWPB ipadala kini ngadto sa National Wages and Productivity Commission alang sa confirmation nga molanat og duha ka semana una ipublikar sa pamantalaan ang bag-ong wage order. (BANAT NEWS)
- Latest
