Paghawan sa kabaybayonan iya sa LGU

CEBU, Philippines — Gitugyan sa Department of Environment and Natural Resources ngadto sa mga lokal nga opisyal ang pagtangtang sa mga nilapas nga istraktura sa 20-meter easement zone sa kabaybayonan.

Giklaro ni DENR-Region 7 Director Gilbert Gonzales nga sila ang nag-delineate sa standard easement zone ug ang pagdeterminar sa mga nilapas nga istraktura sa coastal areas.

Apan matud niya nga anaa gihapon sa local government units ang tahas sa pag-implementar sa demolisyon.

“Nasa LGU na yan. Ang role ng DENR is just to delineate the easement zones so that they will know sino ang nag-encroach sa easement zones,” matud ni Gonzales.

Dugang niya nga ang LGU ang mohatag og building permits sa mga beach ug resort owners aron makapabarug og istraktura sa coastal area.

Ang DENR-7 nag-prioritize pa lang sa ilang inventory ug inspection sa tanang beach resorts ug hotels sa kabaybayonan sa Isla sa Panglao sa Bohol ug Mactan sa Sugbo nga maoy key destination sites sa rehiyon.

Ang pagsumpo sa mga environmental violators sa top beach resorts mao ang usa sa kampanya sa DENR human nialma ang Presidente sa Boracay Island sa Aklan.

Ang mga commercial businesses nga naa sa kabaybayonan mao ang usa sa mga gitan-aw nga rason nga nahugaw ang palibot ilabi na sa mga wala nisunod sa environmental policies ug regulations.

Ang DENR-7 nagtukod og Regional Foreshore Area Task Force aron sa paghimo og inventory ug inspection sa tanang establisemento sa kabaybayonan sa Isla sa Panglao ug Mactan ug isunod ang Oslob ug Moalboal diin aduna nay gihimong lakang aron maprotektahan ang kabaybayonan. (BANAT NEWS)