Shimura mag-privilege speech

CEBU, Philippines —  Mopadangat sa iyang privilege speech si Bokal Sun Shimura may kalabutan sa pagbanhig sa tibuok nilang pamilya sa bisperas sa Barangay ug Sangguniang Kabataan sa Lungsod sa Daanbantayan.

Ang privilege speech ni Shimura naapil sa hisgutanan sa regular nga sesyon sa Hunta Probinsiyal karong hapon.

Matud ni Shimura nga tipik sa iyang mensahe ang pag-awhag sa mga director sa Cebu Provincial Police Office ug Police Regional Office-7 nga dugangan ang police visibility tungod sa sunod-sunod nga patay nga bisan asa nalang.

Sayo niini ang Philippine Military Academy (PMA) Sandigan Class of 1982 nikondenar sa insidente nga naglambigit sa ilang kauban nga kanhi heneral sa kapolisan ug karon mayor sa Lungsod sa Daanbantayan nga si Vicente Loot, ama-ama ni Shimura.

Ang Philippine Military Academy Sandigan ’82 Association Inc. (PSAI) nipadayag sa ilang pagkondenar sa pag-atake sa pamilya ni Loot pinaagi sa pamahayag niadtong May 15.

“The PSAI denounces in no uncertain terms this cowardly attack on their constitutionally protected rights and the safety of one of their members (Loot) and his family,” matud sa pamahayag.

Buntag niadtong Mayo 13, lima ka armadong tawo og M-16 assault rifles ang nipauwan og bala ngadto kang Loot ug sa pamilya niini sa ilang pagdunggo sa pantalan sa Maya gikan sa ilang pagbakasyon sa Isla sa Malapascua.

Hinoon si Loot ug tibuok pamilya walay nasamdan gawas sa duha ka drayber ug yaya sa apo sa mayor nga naangol.

Apan matud sa PSAI nga bisan walay nasamdan apan nakahatag kini og grabeng kahadlok sa pamilya ni Loot.

“This defiant display of armed aggression when the gun ban is strictly imposed by the PNP (Philippine National Police) cannot be countenanced as it is an affront to peace-loving citizens about to participate in the democratic process of selecting their barangay elective officials,” matud sa PSAI. Ang PMA Sandigan Class ’82 nanawagan sab sa mga awtoridad nga paspasan ang imbestigasyon ug paghatag og hustisya ngadto ni Loot ug pamilya niini.

“We appeal to the leadership of the Philippine National Police and the National Bureau of Investigation to conduct an honest to goodness and unrelenting investigation on this incident, and to leave no stone unturned until the solution of the crime is accomplished. This is the only way by which our people can be assured of a peaceful community to live in,” matud sa PSAI.

Ang PSAI statement gipirmahan sa Makati City sa gatusan ka retiradong heneral ug opisyal sa Armed Forces of the Philippines (AFP) ug PNP kauban sa mga honorary members.

Si Loot usa sa ginganlan ni Presidente Rodrigo Duterte nga usa sa lima ka heneral nga nalambigit sa ilegal nga drugas. (BANAT NEWS)