Formalin sa gibaligyang isda?

CEBU, Philippines – Nabulabog ang pagpaninda sa mga manindahay sa merkado sa Tabunok sa dakbayan sa Talisay sa dihang adunay report nga nadawat nga gibutangan og formalin ang mga isda nga gibaligya niini.

Dali nga giinspeksyon sa taga Bureau of Fisheries and Aquatic Resources (BFAR), Department of Agriculture (DA), kapulisan sa Talisay ug sa taga Market Administration ang tanang stalls sa isdaan.

Si Joy Sanchez, market inspector sa siyudad nitug-an nga aduna gyud sila’y gipangsita nga lima ka mga stalls ug gikuhaan og mga sampol ang ilang mga isda.

Siya nagkanayon nga dili pa sila makatumbok gyud dayun kon gibutangan ba og formalin ang ilang gipangbaligya kay ipaubos pa man kini sa eksaminasyon.

Apan ilang nakita sa ilang pag-inspeksyon nga aduna gyu’y mga isda nga gipang-display nga aduna’y gipangbutang nga coloring sa tubig niini.

Si Sanchez nagpasabot nga mao kini ang paagi sa mga fish vendors aron ingnon nga lab-as ang ilang isda. Matud pa niya nga nagsilbing warning lang usa sa mga manindahay ang mao nilang gibuhat apan ang siyudad na maoy mosilot kon tinuod nga aduna gyu’y formalin nga gibutang sa mga isdang gibaligya sa merkado.

Dugang pa ni Sanchez nga matag karon og unya mobalik-balik sila sa pag-inspeksyon sa mga palaliton sa merkado kon kini luwas ba gyud sa mga kunsomidor. (/IBM)(BANAT NEWS)