Staff sa VM, SP gi-drug test
CEBU, Philippines – Gipaubos sa Cebu City Office for Substance Abuse Prevention (COSAP) og kinalit nga drugtest ang 263 ka empleyado sa Office of the Vice Mayor ug Sangguniang Panlungsod kagahapon.
Sumala sa hepe sa COSAP, Garry Lao, nga kini ang ika-16 nga departamento sa Cebu City Hall nga ilang gipaubos sa drug test ug 17 kung apilon ang Bureau of Jail Management and Penology (BJMP).
Dunay mga absent ug naa sa field nga mga kawani apan matud ni Lao nga dili kini rason nga dili mapaubos sa drug test.
“Naa tay existing memorandum issued by the City Administrator’s Office that if you fail to undergo a drug test today and then ni-report ka karon, you will be dealt accordingly,” matud ni Lao.
Dugang niya nga pa-esplikahon sa Human Resource Development Office (HRDO) ang mga empleyado nga dili moapil sa drug test apan ni-report sa trabaho.
Si Lao niingon usab nga termination ang iyang rekomendasyon sa mga empleyado nga mag-positibo. Kini sama sa mahitabo sa duha ka traffic enforcers nga nagpositibo nga gikatakda nga tangtangon sa serbisyo.
Aduna pay kapin sa 30 ang wala niapil sa drug test ug iya na kining gipahibawo ngadto sa HRDO.
“Ma-consider ra kung ni-leave but if you’re there unya wala ni undergo sa drug test, that’s another story,” matud ni Lao.
Ang HRDO ang magbuot kung unsay silot nga ipahamtang kay sila man ang mo-isyu sa memorandum ug magdepende sa rason sa mga kawani. (Katrina Aguirre, CNU Interns/GMR)(BANAT NEWS)
- Latest
