Kopya sa election return nawagtang

CEBU, Philippines – Nawala ang ikaduhang pahina sa election return (ER) sa Barangay Carreta sa dakbayan sa Sugbu ug nadiskubrehan lang human nila giuli sa Commission on Elections (COMELEC) ang mga gigamit sa eleksyon kagahapon sa alas 3 sa kaadlawon.

Sumala pa ni Maria Rose Trillano, chairperson sa Electoral Board sa maong barangay nga aduna silay duha ka sets sa ER para sa kandidato sa barangay ug sa SK.

Giangkon nila nga nasayop sila og suwat kay imbes mga kandidato sa barangay ang isuwat sa ER nga para sa barangay candidates, mga kandidato sa SK ang ilang nabutang.

Ilang gipapas ang ngalan sa mga kandidato sa SK ug gipadayon nila ang pagsuwat sa ngalan sa mga kandidato sa barangay ngadto sa nisunod nga numero.

Mao kini ang hinungdan nga wala maigo ang ngalan sa tulo ka kandidato ngadto sa unang pahina.

Human nila pirmahi,  nataligam-an ang pag-detach ug ang pag-attach sa orihinal nga kopya.

Giingon nga naapil nila og hipos ang ikaduhang pahina sa mga sobrang papel apil na niini ang tally board. Ila daw kining gisulod og apil sa sako.

Sa dihang nahatod na nila sa Comelec ang mga gamit didto na nila nabantayan nga nahanaw ang usa ka kopya.

Gipangita nila kini og balik sa eskuylahan apan gituohang nasagol na kini sa mga papel nga gipanulod og sako.

Wala ray mireklamo sa mga kandidato sa duha ka partido kay nahibaw-an nang daan ang resulta pinaagi sa tally sheets nga naa sa mga watcher. (CNU Intern/IBM)(BANAT NEWS)