Apil sa Flores de Mayo hapit gilugos

CEBU, Philippines — Gibalhug sa prisohan ang usa ka tinun-an sa grade 11 human gipasanginlang nisuway og lugos sa 18-anyos nga babaye kinsa nag-ilis na unta alang sa Flores de Mayo sa Lungsod sa Bantayan niadtong Domingo sa gabii.

Ang suspek giila nga si Bonifacio Mata, 19, residente sa maong dapit.

Matud sa hepe sa Bantayan Police Station, Chief Inspector Florendo Fajardo, nga ang biktima niuli sa ilang balay aron mag-ilis.

Giingong naabtan sa biktima ang suspek nga buot unta mopalit og ilimnong makahubog apan iya kining gibalibaran sanglit wala sa iya ang yawe sa ilang tindahan.

Wala damha sa biktima nga gisundan siya sa suspek paingon sulod sa ilang panimalay ug didto gikuptan ug gihagkan ang biktima.

Apan naabtan sa igsuong lalaki sa biktima ug nadakpan ang suspek kinsa gitugyan ngadto sa kapolisan, matud ni Fajardo. (BANAT NEWS)