Nanglunggo sa ulo sikop

CEBU, Philippines – Nasikop na ang suspek sa pagpanglunggo og ulo ug nakuhaan og marijuana ug usa ka hand grenade sa Sitio Tubil, Barangay Matun-og, Balamban.

Ang suspek giila nga si Alejandro Manigos Talisic, 43, molupyo sa maong lugar.

Kahinumduman nga adunay nakaplagang usa ka patay’ng lawas nga wala nay ulo ang nagpatrolyang mga tanod sa Matun-og ug naila nga si Porferio Perales.

Matud ni PO1 Benjie Mabulay nga dihang girekisa si Talisic nakuhaan kini og marijuana nga giputos og diyaryo ingon hand grenade sulod sa dalang bag.

Sa laing bahin gitigbas ang 30-anyos nga lalaki sa iyang kainom sa Brgy. Calabo-on, Dumanjug alas 6:30 sa gabii sa niaging adlaw.

Si Junry Recabo samdan sa tuong bahin sa kamot human kini gitigbas sa iyang 27-anyos nga kainom ug silingan nga si Gregorio Alconera nga pulos nagpuyo sa maong barangay.

Si SPO4 Jorame Tanudtanud nibutyag nga ang duha kuyog nga nag-inom hangtud niabot sa panaglalis nga maoy hinungdan nga daling nikuha og 14 pulgadang hinagiban ang suspek ug dayong tigbas ngadto sa biktima.

Gitabangan og pugong ang suspek sa mga tawo nga nakasaksi sa panghitabo.

Si Alconera bag-o lang nakapiyansa human gisulong ug gibato ang iyang ugangan.

Mag-atubang si Alconera og kasong attempted homicide ug kalapasan sa election gun ban. (CNU Intern/GMR)(BANAT NEWS)