Mga armas gisurender sa San Fernando

CEBU, Philippines – Gipangulohan ni San Fernando Mayor Neneth Reluya ug sa hepe sa kapolisan sa lungsod nga si Senior Insp. Aujero Nalua ang seremonya nga pagsurender sa mga dili lisensiyadong armas kagahapon sa hapon.

Kini aron paglikay sa posibleng bayolenteng hitabo atol sa eleksiyon hinungdan nga giawhag ni Reluya ang mga kandidato nga mo-surender sa ilang mga armas.

Niabot sa 32 ka armas ang gisurender ngadto sa kapolisan sa lungsod gikan sa mga opisyal sa barangay, tanod ug mga kandidato.

Matud ni Reluya nga alang sab kini sa kaayuhan sa mga molupyo sa lungsod.

Hinoon si Nalua niingon nga wala pa silay na-monitor nga major problem sa lungsod ug naglaum nga magpadayon nga malinawon ang mga tawo hangtud human sa eleksiyon.

Samtang gipasiugdahan sa kapolisan ug kaparian sa ikaunom nga distrito sa Lalawigan sa Sugbo ang peace covenant signing sa mga kandidato sa Barangay ug Sangguniang Kabataan (SK) Elections.

Sa Lungsod sa Cordova gipahigayon niadtong Abril 25 diin gisalmutan sa mga kandidato sa 13 ka barangay.

Niadtong Miyerkules gihimo sa Mandaue City Sports and Cultural Complex ang peace covenant signing sa 680 ka kandidato sa Barangay ug SK sa dakbayan.

Samtang sa Lungsod sa Consolacion ipahigayon ang susamang kalihukan karong buntag alang sa mga kandidato sa 23 ka barangay sa maong lungsod. (CNU Intern ug Romeo T. Limpangog/GMR)(BANAT NEWS)