P160 mil shabu sakmit sa 24 ka pushers

CEBU, Philippines – Nasakmit ang mokabat P160 mil nga balor sa shabu samtang 24 ang arestado sa managlahing operasyon sa kapolisan sa Siyudad sa Sugbo.

Balor og P118 mil ang nasakmit gikan sa usa ka Kevin Dominguez, 22, taga Sitio Bato, Ermita, niadtong Martes sa gabii.

Samtang sa Unit II Oppra, Kalunasan nadakpan sa akto sa paggamit sa ilegal nga drugas sila si Romualdo Cornejo, 55, ug Aljun Infiesto, 21, kagahapon sa kadlawon, kinsa nakuhaan og shabu nga mobalor og P20 mil.

Mokabat sab sa P18 mil ang balor sa shabu ang nasakmit gikan sa 19-anyos nga si Junel Balderas sa Sitio Palay, Sambag 2.

Sa Sitio Kalubihan, Basak San Nicholas nadakpan ang mag-amahan nga sila si Michael Villanueva, 51, ug Dave Villanueva, 21, sa paggamit og ilegal nga drugas.

Sa Sitio Katouran, Pit-os nadakpan si Wifredo Pitogo Suquib, Jr., 42, kinsa nasakmitan og mobalor og P4,000 nga shabu.

Nadakpan sab sila si Jherson Rafols Nodalo, 20, taga U. Alviola St., Tejero, ug Alexander Epili Taghap, 49, taga Cabancalan, Mandaue City.

Laing nadakpan sa akto sa paggamit og ilegal nga drugas sa Quijano Compound, Calamba nga sila si Olamid Duman, 18, taga Mambaling; Arnold Goldove, 29, taga Babag 2, Lapu-Lapu City; Eduardo Macapobre, 32, taga Cantabaco, Toledo City ug Jaypee Blanco, 31, taga Oppra, Kalunasan.

Nasakmit sab gikan kang Rosylyn Tagalog, 38, ang mga drug paraphernalia sa nagpatrolyang kapolisan sa Sitio Fatima, Kamagayan niadtong Martes sa buntag.

Samtang kagahapon sa buntag nadakpan si Adora Baclaan Gloria, 44, sa buy-bust operation sa Sitio Paradise, Kinasang-an diin nasakmitan siya og shabu nga mobalor og P94 mil.

Niadtong Martes sa hapon nadakpan sa akto ang duha ka drayber sa traysikol nga sila si Rolando Incorporado, 40, taga Sitio Paradise, Looc, ug si Rudy Embalsado, 32, taga Sentro, Looc, Siyudad sa Mandaue ug usa ka giilang Glenn Serata ang nadakpan sab sa paggamit og ilegal nga drugas sa Sitio San Miguel, Lorega, ug Luisito Lawas, 42, taga E. Fernandez St., Punta Princesa, kinsa nasakmitan og 14 ka gagmay’ng pakete sa shabu ug usa ka .22 kalibre nga revolver.

Niadtong Martes sa gabii tulo sab ang nadakpan sa ilegal nga drugas sa Duljo Fatima kinsa ang usa giila nga si Hilario Panes, 33, kinsa nasakmitan og mga drug paraphernalia samtang si Milphy Malagasa, 38, ug Sergio Resma, 42, nadakpan sa kasong pagpamaligya og ilegal nga drugas human nasakmit ang 10 ka pakete sa shabu.

Laing nadakpan sa paggamit og ginadiling drugas mao si Arnel Yumo, 28, taga Sitio Cekalco, Labangon.

Samtang sa Sitio Maharlika, Sambag 2, nadakpan si Jimbo Tapayan, 37-anyos.

Sa laing bahin, usa ka 51-anyos nga ginang ang nagtingkagol sa prisohan human nasikop sa pagpamaligya og shabu sa Sitio Magay, Tangke, Talisay City niadtong Martes sa gabii.

Ang nasikop mao si Florecita Labajo Cabanes, kinsa naaktohan nga naghupot og drugas nga mobalor og P35 mil. (CNU Intern ug Rowena D. Capistrano/GMR)(BANAT NEWS)