Pansayan duol sa dagat ipaayo

CEBU, Philippines – Aron dili masusama sa Boracay Island, giawhag ni Bise Gobernador Agnes Magpale ang mga residente ilabi na ang mga nagpuyo sa baybayon nga ayuhon ug panindoton ang ilang mga pansayan.

Bisan ang mga sikat nga tourist destinations sama sa Camotes Island gimanduan na ang mga developer nga mohimo og 4-chamber waste water treatment facility kung magtukod og bag-ong hotel o resort aron limpyo ang tubig nga mobalik sa dagat ug dili manimaho ug masusama sa Boracay Island.

Si Magpale nagkanayon nga human sa nahitabo sa Boracay nahimo kining “eye-opener” sa ubang tourist destinations hinungdan nga iyang giawhag ang mga local government units nga mosubay sa lagda sa pagpatukod sa mga resorts ug ingon man ang pagseguro nga limpyo kini.

“We don’t want to be called cesspool,” matud ni Magpale.

Ang bise gobernador niawhag sab sa mga residente duol sa dagat nga ipagamit sa mga turista ug pabayran lang og gamay ang ilang mga pansayan aron adunay maintenance sa paglimpyo.

Niining panahon sa tingbakasyon, daghan sa mga turista nga mobisita sa isla diin ang uban igo na lang magtukod og tent sa baybayon ug wala’y pansayan nga magamit.

Si Magpale nipahimangno usab nga angay adunay “carrying capacity” nga ipatuman sa mga tourist destinations aron dili magdasok ang mga turista nga maoy hinungdan nga mapasagdan na ug dili na mamintinar ang kalimpyo ug kanindot niini. (/GMR)(BANAT NEWS)