Drugbust sa hotel, duha nadakpan

CEBU, Philippines – Duha ka tawo ang nasikop atol sa gipahigayon nga buy-bust operation sa kapulisan sa Argao sulod sa usa ka hotel sa may barangay Poblacion.

Ang nasikop mao sila si Reyan James Gonzales, 27, taga Unit 4 Oppra, Barangay Kalunasan, Dakbayan sa Sugbo ug Sheina May Ruiz, 19, taga Barangay Bakilid, Mandaue City.

Nasakmit gikan sa mga dinakpan ang drugas nga motimbang og 5.5 gramos nga mobalor og dul-an sa P65 mil, buy-bust money, P11 mil nga gituohang halin,ug duha ka syringes.

Matud pa ni Police Officer 2 Roy Repolidon, Desk Officer sa Argao Police Station, nasikop ang duha human ang menor de edad nga runner nila sa drugas nadakpan niadtong Biyernes ug maoy nitultol sa kapolisan sa ilang nahimutangan.

Sa laing operasyon, dul-an P140 mil nga gituohang shabu ang nasakmit gikan sa tulo ka mga dinakpan sa managlahing operasyon didto sa barangay Mabolo ug Ermita ning dakbayan sa Sugbo.

Ang nasikop mao sila si Ronell Blanco, 30, ug si Bernabe Cabangca alyas "Timoy", 30.  Nakuha gikan kang Blanco ang duha ka small size ug usa ka medium size nga pakete sa gituohang shabu ug drug paraphernalia.

Samtang kang Cabangca, usa ka small size nga pakete, usa ka medium size nga paketeng shabu ug usa ka ice pick.

Samtang ang team nga gipangulohan ni Sr.Insp. Jonathan Bethooven Taneo sa Carbon Market Police Station nakasikop ni Joshua Meliang Malasaga diha sa Sitio Bato, Barangay Ermita niadtong Huwebes sa gabii apan kini taga Sitio Riverside, Barangay Duljo Fatima, usa ka street level target ug apil sa watchlist.

Nasakpan kini sa akto nga nangandam og drug paraphernalia sa usa ka payag ug nakuhaan usab og 11 ka gagmay’ng paketeng gituohang shabu.

Matud pa ni PO1 Lucille Hilario sa WCPD sa maong estasyon, niingon kining suspek nga siya 17 anyos maong ila kining gipaubos sa dental aging examination didto sa CCMC apan nasuta nga kini nag edad na og 18 anyos pataas. (Kathleen Kaye G. Gonzaga ug Jomelyn B. Largado, CNU Interns/IBM)(BANAT NEWS)