Unom ka kinarnap nga motor na-recover

CEBU, Philippines – Unom ka mga kinawat nga mga motorsiklo ang gipangbawi niadtong Huwebes sa buntag sa mga sakop sa Highway Patrol Group (HPG) gikan sa mga nakapalit niini didto sa barangay Maslog, Dakbayan sa Danao human mitug-an ang dinakpang carnapper sa iyang modus operandi. Nadakpan sa hot pursuit operation niadtong Abril 27,2018 sa gabii didto sa Sitio Pulang Bato, Barangay Looc, Dakbayan sa Danao ang suspetsado nga si Dexter Estrada alyas Dexter Estrera, 21, residente sa Dakbayan sa Mandaue

Si Estrera nasakpang nangawat og usa ka Honda Wave nga motorsiklo didto sa Barangay Basak, Dakbayan sa Lapu-Lapu ug nakuhaan kini og granada.

Matud pa sa ni Senior Inspector Michael Gingoyon, Provincial Officer sa HPG, mitug-an kanila ang maong dinakpan nga daghan na siya og nabaligya nga motorsiklo didto sa Dakbayan sa Danao nga puros mga kinawat gikan sa Metro Cebu.

Ang maong mga motorsiklo ibaligya niini og singko ngadto sa sais mil pesos matag usa hinungdan nga gihimoan nila kini og follow-up operation.

Sa gihimo nilang pagsubay nasakmit nila ang unom ka mga motorsiklo gikan sa gitudlo sa suspetsado nga iyang gibaligyaan sa Danao nga giingong gipaabangan usab aron himuong habal-habal. Gitun-an usab karon kon kasohan ang mga nakapalit sa mga motor. Ang mga nasakmit mao ang: usa ka Honda XRM( GF-28092); Honda Wave (9184-YX); Honda RS (GC-42682); Honda XRM (9764-YC)  ug Honda XRM ( 5889-OS).

Matud ni Gingoyon nga anha mag-apong si Estrada sa mga parking areas ug gamit ang master keys iyahang padaganon ang motor. Gipahimangnoan sa HPG ang publiko nga i-lock gyud ang ilang motorsiklo ug dili mopalit niining mga barato ra kaayong mga motor kay posibleng kinawat kini. (/IBM)(BANAT NEWS)