Gikan nipiyansa gipatay

CEBU, Philippines – Gipusil patay ang usa ka lalake nga gikan lang nagbayad og piyansa sa pag-abot niini sa Sitio Itom Yuta,  Barangay Lorega,  Dakbayan sa Sugbo niadtong Lunes sa hapon. Ang biktima giila nga si Wilson Borla Magdasal,  56, residente sa Proper Lorega sa maong barangay.

Matud pa ni PO2 Christopher Bongo sa Homicide Section, ang biktima kauban ang iyang asawa gikan sa Qimonda nagbayad sa piyansa aron makagawas sa prisohan tungod sa pagkaaresto niini niadtong Abril 18,2018 tungod sa paghupot og ilegal nga drugas.

Samtang sila naglakaw, adunay duha ka wa pa mailhing mga lalaki nga miduol sa biktima ug diretsong mipusil niini. Misuway kini og dagan apan kini gigukod ug giusban ug dihang natumba gitiwasan.

Ang biktima patay na pag-abot sa Cebu Doctor’s Hospital. (CNU Intern/IBM)(BANAT NEWS)