Duha ka magsuon gidunggab
CEBU, Philippines — Duha ka managsuong lalaki ang nakaangkon og mga samad dinunggaban human sila giluba sa kanhi karelasyon sa ilang igsuong babaye diha sa Barangay Lawaan, Dakbayan sa Talisay.
Ang mga biktima mao sila si Zeldy Reyna, 32, samdan sa wala nga kamot ug si Benedicto Reyna, 38, nga nasamdan sa tuo nga siko human sila gipangduslak og bolo sa suspek nga si Filveepre Brigoli, 54.
Matud pa ni SPO1 Aquies Cabando nga nag-inom ang mga biktima diha sa ilahang balay dihang kalit miabot ang suspek ug gipangduslak sila niini sa gidala nga bolo.
Sumala pa ni Cabando base sa imbestigasyon nagduda ang suspek nga ang duha maoy nitambag sa igsuon nilang babaye aron kini buwagan.
Ang suspek kinsa nadakpan sa kapolisan gikatakdang pasakaan og kaso samtang ang duha gidala sa tambalanan. -/IBM (BANAT NEWS)
- Latest
