Rumble strips gibutang sa Kanyuko Road

CEBU, Philippines — Ang Department of Public Works and Highways sa rehiyon (DPWH-7) mibuhat og aksyon paglikay sa posibleng lain na usab nga disgrasya sa kadalanan pinaagi sa pagbutang og rumble strips ug pavement markings sa Barangay Kanyuko sa Lungsod sa Dumanjug kon diin nahitabo ang panagbangga sa duha ka sakyanan nga mikalas og lima ka tawo usa ka semana na ang nakalabay.

Matud ni Joy Tumulak, focal person sa Cebu Provincial Traffic, mihatag og kamanduan si Gobernador Hilario Davide III kon unsay himoong lakang paglikay sa disgrasya sa nahisgutang dapit.

Paghuman sa usa ka oras nga inspeksyon sa lugar niadtong miaging Martes, gihimo dayon sa DPWH-7 ang thermoplastic operation kon asa magbutang og rumble strips nga usa ka raised shreds diin makamugna og saba sa ligid sa mga sakyanan aron magpahimangno sa mga drayber sa pagpahinay sa gikusgon sa ilang dagan.

Gawas sa rumble strips ug pavement markings, ang public works office usab sa maong dapit mipahigayon og pagpanglimpyo kilid sa dalan aron mabutangan og mga karatula nga makatabang usab sa mga motorista paglikay sa aksidente.

Si Dumanjug Mayor Rene Asentista miawhag kang Tumulak nga mopahigayon og training ngadto sa mga traffic enforcer aron mapakusgan ang road management sa ilang lungsod. - Myca Mae Gabato ug Caren Abing, CNU Interns (BANAT NEWS)