Tuburan hugot nga bantayan

CEBU, Philippines – Ang lungsod sa Tuburan usa sa hugot nga gibantayan sa kapolisan tungod sa panagribal sa mga kandidato ug presensya sa mga private armed groups karong piniliay.

Gimandoan ni Chief Superintendent Robert Quenery ang tanang unit commanders sa pag-maximize og maayo sa ilang mga sakop aron mabantayan kining mga hot spot areas atol sa piniliay nga nagkinahanglan og dugang pulis.

"We trust the unit commanders to strategize na maximize nila ang security coverage in security areas na depleted ang strength nila," siya miingon.

Midugang si Quenery nga duna nay mga police stations nga nangayo og dugang pwersa tungod kay init ang panagribal sa mga kandidato sa ilang mga dapit. Ang dugang pwersa magagikan sa mga lungsod nga dili kaayo init ang panagribal.

"Humihingi ng additional personnel malapit na ang election kaya we  have to send people there from  area na hindi masyadong contested," sigon pa ni Quenery.

Si Quenery miingon nga wala pa sila ka finalize sa kung pila  gyud ang gikinahanglang dugang polis apan masaligon siya paigo ang gidaghanon sa iyang mga sakop sa PRO-7.

"Wala pang figures pinapa-finalize ang threat situations and project ilan ang Tuburan and Negros Oriental," ingon pa ni Quenery.

Ang Negros Oriental Provincial Police Office (NOPPO) mirekomendar na og dugang 79 pa ka barangay nga ipaubos sa election watchlist area (EWA).

"We have around 79 watchlist areas in Negros Oriental, due to affectation of NPA...we will have to assess again because as election comes nearer naiiba ang landscape ng politics kaya  continous pa rin ang coordination," siya miingon.

Sa miaging semana , si Cebu Provincial Police Office director Edgar Alan Okubo mipahibalo nga magkinahanglan siya og 700 ka mga pulis aron pagbantay sa tibuok lungsod sa Tuburan.

Ang lungsod sa Tuburan ang una na niya nga girekomendar nga ipaubos nga EWAs human sa reports sa presensya sa mga private armed groups.

Gisubay pa usab kining posibleng pagpaubos sa Daanbantayan sa susamang kondisyon tungod sa political rivalry nga namonitor.

Matud pa ni Quenery makatabang pud ang pagpalusad sa mga peace covenants sa mga modagan sa eleksyon sa rason nga magpamatuod kini nga committed ang mga politiko nga pabilinong hapsay ang dagan sa eleksyon.

"Malaking bagay yan. We always encourage our LGUs to initiate peace covenants.

This is a pledge and commitment to the people that the conduct of barangays will be peaceful.

It's their word that elections are really safe," matud pa niya.(/IBM)(BANAT NEWS)