213 drug-cleared brgys alang sa SGLG

CEBU, Philippines – Malaumon ang pangulo sa Cebu Provincial Anti-Drug Abuse Office (CPADAO) nga maka-comply ang Probinsiya sa Sugbo sa usa sa mga criteria sa pagkuha sa Seal of Good Local Governance (SGLG).

Ubos sa peace and order criteria, kinahanglan nga makuha sa probinsiya ang 20 porsiyento sa kinatibuk-an nga gidaghanon sa barangay nga drug-cleared.

Sa kaso sa Probinsiya sa Sugbo, sa 1,066 ka barangay kinahanglan nga adunay 213 niini ang drug-cleared.

Sa pagkakaron, 160 pa lang ka barangay ang nadeklarar nga drug-cleared.

Matud ni Carmen Remedios Durano-Meca, pangulo sa CPADAO, nga ilang gipaninguha nga makab-ot ang 213 nga drug-cleared diin aduna pay 73 nga giendurso nga mahimong drug-cleared.

Sa Mayo 4 gipaabot nga tukion sa oversight committee ang unang 35 ka barangay nga gi-endurso aron ma-drug-cleared human kini niagi na sa on-site validation sa team sa komitiba.

Samtang gipaabot nga ang laing 38 maendurso na sab sa buwan gihapon sa Mayo diin 18 niini gikan sa Tabogon, pito sa Oslob, lima sa San Francisco, usa sa Dakbayan sa Naga ug upat sa Samboan.

Ang mga barangay sa Oslob napaubos na sa on-site validation niadtong Biyernes samtang sunod semana ang mga barangay na sab sa San Francisco.

Si Meca positibo nga ma-drug-cleared nila ang 73 sa dili pa ang deadline sa katapusang semana sa Mayo sa pagsumiter og report.

“Dili lisud nato kay we have pending barangays for drug-clearing,” matud ni Meca.

Ang SGLG usa ka award nga ihatag sa Department of Interior and Local Government (DILG) sa mga local government units nga maayo ang performance sa financial administration, disaster preparedness, social protection and tourism, culture and arts, ug peace and order.

Ang Probinsiya sa Sugbo katulo na nakakuha sa maong award sulod sa tulo na ka tuig. (/GMR)(BANAT NEWS)