‘Mangingilad’ gireklamo sa 80 ka biktima

CEBU, Philippines – Gidakop niadtong Miyerkules sa gabii sa Kasambagan, Dakbayan sa Sugbo ang 37-anyos nga gikatahapang mangingilad kinsa gireklamo sa dili mominus 80 ka nagpailang biktima sukad pa niadtong tuig 2012.

Giila ang dinakpan nga si Maria Victoria Torralba, lumad nga taga Dakbayan sa Naga ug giingong nagbalhin-balhin na og puy-anan sa Dakbayan sa Sugbo.

Ang pagdakop pinasikad sa warrant of arrest sa kasong estafa nga giluwatan niadtong Hulyo 7, 2017.

Sumala pa sa deputy public information officer sa Police Regional Office-7, Senior Insp. Reslyn Abella, nga lain-laing pangilad ang modus sa suspek.

Giingong nalambigit kini sa pyramid scam, investment scam ug nahimo sab kining middleman sa usa ka lending institution diin matud pa nga dili na niini i-remit ang ibayad sa kliyente ngadto sa kompanya.

Mogamit sab kini og lain-laing pangan ug gani duna pay Unified Multi-Purpose ID nga ang pangan nga gigamit usa ka Chloe Cañete.

Niabot sa 22 ka warrant of arrest sa susamang kaso ang nakalap sa kapolisan lakip na ang pinirmahan ni Debalucos.

Nahinabi sa Banat News ang nagpailang lakip sa mga biktima ni Torralba ug nipasaka og kaso batok niini sila si Alicia Talandon, 62, ug anak niini nga si Cherilyn Talandon, 36, pulos taga Dakbayan sa Naga.

Matud ni Alicia nga silingan nila si Torralba ug una nilang nakaila kini niadtong tuig 2014 sa usa ka prayer group sa ilang lugar.

Giingong giaghat sila nga mo-invest sa negosyong bugas ni Torralba ug gisaaran sa suspek nga motubo ngadto sa 20 porsyento ang kwarta nga ilang ibutang sa negosyo niini ug pakapinan pa og usa ka sakong bugas.

Naingganyo ang mag-inahan ug nihulog og P250 mil ug giingong gibayran gyud sila og 20 porsyento ug ang pakapin nga bugas nga gisaad sa suspek.

Human nasayri sa ubang sakop sa ilang pamilya, niapil sab kini diin niabot sa dili mominus P2 milyones ang nakuha ni Torralba gikan sa ilang pamilya.

Niapil sab sa investment ang mga silingan ug mga higala nilang Alicia.

Apan dangtan sa pipila ka buwan, giingong wala na sila makadawat og balik pa gikan ni Torralba.

“Sige lang na siya og promise. Sugod pa gud to 2014 hangtud ron wala gyud,” matud ni Cherilyn.

Butyag ni Cherilyn nga magpahigayon og mga meeting si Torralba ug mang-imbitar og mga representative sa marketing ug accounting gikan sa mga kompanyang giingong wala pa namayad sa negosyong bugas niini aron pasabton sila nganong wala pa makabayad ang kompanya ngadto kang Torralba.

Apan ilang nadeskobrehan nga peke ug binayran ra diay kadtong mga nagpailang mga representante sa usa ka kompanya.

Dugang gibutyag sa duha nga hulgaon sila ni Torralba nga kon mopasaka sila og kaso dili na gyud sila bayaran niini.

Nailad sab ang usa ka Engr. Cornelio Duaso, 55, nga usa ka businessman.

Matud niya nga gisaraan siya ni Torralba nga magtukod og usa ka review center sa engineering sa Dakbayan sa Sugbo apan sa dihang andam nang magsugod, giingong gidagan sa suspek ang kwarta nga binayad sa mga estudyante.

Gihimakak sa suspek ang pasangil apan niangkon nga nalugi lang siya sa negosyo.

“Mo say ko’g sorry, mo-settle ko nila, willing ko mouli sa ilang money. Nakabayad ko, nakahatag ko sa profit, naabot lang gyud sa time nga napurdoy ko kay na-invest nako sa lain unya wa ko bayari. In good faith ko mobalik nila,” si Torralba niingon.

Piyansa nga kapin P300 mil ang bayran sa dinakpan. (/GMR)(BANAT NEWS)