Ang DPS manghatod og tubig sa kabukiran
CEBU, Philippines – Mo-deliver og tubig ang Department of Public Services (DPS) ngadto sa nagkalainlaing barangay sa siyudad sa Sugbo nga nagnihit og tubig, ilabi na sa kabukiran.
Si John Paul Gelasque, assistant head sa DPS, nagkanayon nga nakadawat na sila og mga hangyo gikan sa mga lumolupyo sa kabukiran nga magpahatod og tubig.
Ang tubig project sagad gyud nga pagahimoon sa DPS matag panahon sa ting-init aron matubag ang panginahanglan sa mga apektadong lumolupyo.
Makig-alayon ang DPS sa Metro Cebu Water District (MCWD) kay ang DPS anha man mokuha og tubig gikan sa ilang mga linya. May mga barangay na sa bukid nga nag-antos sa kanihit sa tubig tungod nagsugod na kainit nga panahon.
Sa pikas bahin, mohatag ang City Agriculture Department (CAD) og mga kagamitan sa mga mag-uuma aron pagbatok sa climate change.
Hinoon, pagka karon wala pa gayud maapektohi ang mga pananom sa mga mag-uuma apan nanagana na daan ang mga opisyal sa siyudad.
Matud ni City Agriculturist Apple Tribunalo nga nanghatag sila og mga plastic hose nga magamit sa mga mag-uuma sa pagbisibis og tubig sa ilang mga tanom gikan sa mga tinubdan. Lakip sa gipanghatag sa CAD mao ang mga baril nga kapundohan og tubig. (Erly Ann Alcontin, CNU Interns/RUB)(BANAT NEWS)
- Latest
