Ubang barangay magmingaw sa eleksiyon
CEBU, Philippines — Giisip nga labing malinawon ang duha ka barangay sa Dakbayan sa Mandaue sa eleksiyon karong Mayo 14 tungod kay walay karibal ang kandidato.
Kini sukwahi sa pipila ka barangay sama sa Labogon nga init ang panagribal human napasuspenso si Kapitan Renato Suson kinsa si Konsehal Amado Manatad ang nihulip ug maoy mag-atbang sa piniliay sa pagka-kapitan.
Si Barangay Kapitan Ignacio Ian Cortes sa Centro ang walay kaatbang ingon man si Kapitan Oscar del Castillo sa Casuntingan.
Walay kontra ang kandidato sa pagka-chairman sa SK sa Casuntingan ug Cambaro.
Ang Mandaue City Police Office (MCPO) mopasiugda og peace covenant signing sa mga kandidato aron pagseguro nga mahimong malampuson ug malinawon ang piniliay.
Sa Dakbayan sa Lapu-Lapu, dul-an sa 1,200 ka tawo ang niduso sa ilang certificate of candidacy diin unom sa 30 ka barangay sa siyudad ang walay kaatbang ang kandidato sa pagka-kapitan ug SK chairman.
Kini mao ang Barangay Babag, Ibo, Suba-Basbas, Tungason, Caohagan ug San Vicente.
Tungod kay sunod semana magsugod na ang campaign period, pahimangno ni City Election Officer, Atty. Ann Janette Hu-Lamban nga sundon lang gyud kung unsay anaa sa balaud aron kalikayan ang kakulian. (GMR) (BANAT NEWS)
- Latest
