Dili kahibawo molangoy, nalumos

CEBU, Philippines – Nalumos ang dose anyos nga batang lalaki samtang nangaligo og dagat kauban sa iyang mga higala sa pantalan sa Barangay Liloan sa Lungsod sa Santander niadtong Biyernes sa hapon.

Ang biktima giila nga si Joemar Restatoy, estudyante sa Grade 5 sa Santander Elementary School ug residente sa Barangay Poblacion sa nahisgutang lungsod.

Matod ni PO3 Antonio Belisco sa Santander Police Station nga wa mananghid ang maong bata sa iyang ginikanan nga mouban sa iyang tulo ka mga higala nga mangaligo sa naasoy nga pantalan.

Giingong naabot sa lawod ang maong bata nga dili diay kahibalo molangoy  hinungdan nga nagpatabang kini sa iyang mga higala. Dali usab nga nangayo og tabang ang duha niini ka higala sa mga tawo nga anaa sa baybayon.

Narespondehan kini sa polis nga si PO1 Mike Badon ug maoy mihimo og CPR kon cardiopulmonary resuscitation ngadto sa bata apan giingong wala na kini molihok maong nanawag ang maong polis sa ilang estasyonan aron madala sa tambalanan.

Gitug-an ni PO3 Belisco nga gikan sa ilang estasyonan, gidala sa mga back-up nga polis ang municipal doctor sa ilang lugar nga si Dr. Arnel Jorhani apan pag-abot sa lugar gideklarar sa doktor nga patay na ang maong bata. (/DILT)(BANAT NEWS)