Filing sa COCs gilugwayan

CEBU, Philippines – Gilugwayan kutob unyang alas-5 sa hapon karong adlawa ang pagduso og Certificate of Candidacy alang sa umaabot nga piniliay sa Barangay ug sa Sangguniang Kabataan karong Mayo 14 sumala pa sa gipagawas nga resolusyon sa Comelec.

Si Provincial Election Officer Lionel Marco Castillano nakadawat sa kopya sa Comelec Resolution 10310 nga nag-extend sa filing sa COCs.

Nagsugod ang pagduso sa COC didto sa Commission on Elections niadtong Abril 14 ug kagahapon unta ang katapusan adlaw niini apan gilugwayan kutob alas-5 karong hapon.

Sa sunod semana magtigom ang Comelec kauban sa kapolisan ug Armed Forces of the Philippines- Central Command aron tun-an ang seguridad.

Apil niini kon asang dapit ang hotspot areas diin init ang panagribal sa mga kandidato ug dunay ERVI (Election related violent incidents) sa nakalabay nga mga piniliay.

Kagahapong adlawa, aduna pay miapas pagsang-at sa ilang COCs sa dakbayan sa Sugbo. Sa North District, miduso kagahapon ang 10 ka mga kandidato sa pagkakapitan, 106 sa pagka-konsehal, 17 sa chairperson ug 59 sa SK member.  Ang Comelec Cebu City nakadawat og 3,267 ka mga kandidato gikan sa SB ug SK nga miduso sa ilang COCs.

Ang Comelec subling mipahimangno sa mga kandidato nga dili una mangampanya kon wala pay campaign period sanglit supak kini sa balaod.

Nunot sa mga campaign posters nga nanggawas bisan kon wala pa ang campaign period, si election officer Atty. Anna Fleur Gujilde  mihangyo sa mga kandidato nga tangtangon kini aron di sila sa Comelec maoy manangtang ug sila makasohan.(Jhan Nysse Capus, CNU Intern/IBM)(BANAT NEWS)