Anti-poverty alleviation program ilusad sa Sugbo

CEBU, Philippines – Gikatakdang mobisita nganhi sa Sugbo karong adlaw’ng Sabado si Cabinet Secretary Leoncio “Jun” Evasco aron iduso sa Visayas ang anti-poverty alleviation program sa administrasyon karon ni Presidente Rodrigo Duterte.

Ang maong programa gikatakdang sugdan nganhi sa Sugbo karong umaabot Abril 21, 2018. Si Evasco ang mangulo sa paglusad sa programa nga ipahigayon tibuok adlaw diha sa Cebu Technological University (CTU).

Ang “Biyaya ng Pagbabago Tungo sa Masagana at Matiwasay na Buhay Pilipino” gipasiugdahan sa buhatan sa cabinet secretary ubos sa pagpangulo ni Evasco ubos sa pakigtambayayong sa Kilusang Pagbabago movement. Tumong sa maong programa nga daling mapaabot ngadto sa komunidad ang mga serbisyo gikan sa national nga kagamhanan.

Ang mga ahensiya nga mosalmot ug mopahigayhon sa ilang mga nagkadaiyang serbisyo gilangkuban sa Department of Agriculture (DA), Bureau of Fisheries & Aquatic Resources (BFAR), Department of Environment & Natural Resources (DENR), Department of Agrarian Reform (DAR), Department of Labor & Employment (DOLE), Philippine Statistics Authority (PSA), Department of Interior & Local Government (DILG), Philippine Coconut Authority (PCA), Department of Trade & Industry (DTI), Cooperative Development Authority (CDA), National Food Authority (NFA), Philippine Information Agency (PIA), Department of Health (DOH), Department of Social Welfare & Development (DSWD), Social Security System (SSS) , TESDA, ug mga housing agencies.

Lakip sa serbisyo nga ihatag atol sa kalihukan mao ang libreng dental and medical, libreng scholarship programs ug uban pa diin naa sila’y mga booth diin ang mga tawo pweding makapangutana.

Ang maong programa gikatakdang ilusad usab ngadto sa nagkadaiyang mga lugar sa Visayas nga gilangkuban sa Talibon, Bohol karong Abril 28;  Tacloban City karong  Mayo 5; Iloilo City karong Mayo 19; Roxas City sa Capiz karong Mayo 26;  Ormoc City karong Hunyo 2; Catarman, Northern Samar karong Hunyo 9; Sagay, Negros Occidental karong Hunyo 16; ug Dumaguete City, Negros Oriental karong Hunyo 30. (Niña Mae P. Salvacion, CNU Interns/BDB)(BANAT NEWS)