Sakyanan sa siyudad gigamit og laag-laag?

CEBU, Philippines — Gisusi sa General Services Office (GSO) ang report labot sa duha ka sakyanan nga iya sa siyudad nga nakit-an sa pipila ka mga lugar sa Lungsod sa Carmen.

Sa post sa usa ka Ernest Herrera sa iyang Facebook account niadtong Abril 14 nagpangutana kini bahin sa sakyanang may plakang SKN-781 nga nakit-an sa usa ka zoo.

“What is this gov’t van doing at Cebu Safari? Official trip? From what agency?” caption ni Herrera sa iyang post.

Ang laing sakyanan nakit-an ni Apas Barangay Captain Ramil Ayuman sa Carmen nga iyaha ‘sab gi-post sa Facebook account apan gitangtang ra usab sanglit dili siya mo-file og reklamo.

Ang pangulo sa GSO nga si Ronald Malacora mibutyag nga ang maong sakyanan nga dunay plaka nga SKN-781 nga nasigpatan sa usa ka zoo sa maong lungsod na-isyu ngadto sa buhatan ni Konsehal Alvin Arcilla samtang ang laing sakyanan nga nasigpatan sa Our Lady of Manaoag Rosary Center sa St. Monastery sa Carmen, Cebu sa susamang lungsod nga dunay plate number SKZ 910 na-isyu ngadto kang Kapitan Rey Lauron sa Barangay Cambinucot.

 “Ang Cambinucot nag-wonder lang ko kay ang purpose man gud anang sakyanana mao nang wala naapil sa recall atong una kay patrol vehicle kuno na sa mga tanod niya nganong naabot man didto sa Carmen?” asoy ni Malacora.

Sila si Arcilla ug Lauron pulos miangkon nga gigamit ang maong mga sakyanan niadtong weekend didto sa Carmen.

Matud ni Arcilla gibisita niya ang Cebu Safari ug Adventure Park niadtong Sabado aron pagsusi kon giunsa pag-develop sa mountain area tungod kay adunay on-going amendment sa Comprehensive Land Use Plan ug zoning ordinance sa siyudad nga ilahang gitun-an.

Siya miklaro nga adunay trip ticket ang biyahe ug dili lang ang Safari ang ilang bisitahon bahin sa ilang pagsusi tungod kay karong Huwebes ug Biyernes moadto usab sila sa Taguig City ug Quezon City alang gihapon sa parehong katuyoan.

“Kon naa sila’y problema akong tubagon. Makigpusta ko kun moingon sila nga kuyog nako akong pamilya,” matud sa konsehal.

Samtang si Lauron miasoy nga grupo sa mga senior citizens ug pipila ka mga katekista nga may pagtugot kaniya ang migamit sa maong sakyanan alang sa pilgrim.

“Ipagamit gyud na nako, wala gyud nay problema nako, kuan gyud ko service beyond colors gyud ning akoa. Wa ni politika bisa’g kinsa pa mogamit ana, ipagamit gyud nako kay dili na akong personal kondili sa katawhan gyud na,” sigon ni Lauron. (BANAT NEWS)