Gipusil patay pagsugod sa gun ban

CEBU, Philippines — Taliwala sa gipatuman sa Commission on Elections nga gun ban, usa ka 20-anyos nga lalaki ang gipusil patay sa duha ka wala mailhing lalaki sa Barangay Tolosa, Lungsod sa Malabuyoc niadtong Sabado sa hapon.

Ang biktima giila sa Malabuyoc Police Station nga si Joseph Secusan, ulitawo ug residente sa maong lugar.

Sigun pa ni Police Officer 1 Leonardo Olores Jr., imbestigador sa maong kaso, nga nagsakay sa iyang motorsiklo ang biktima gikan sa taboan sa barangay apan pag-abot sa maong lugar gipusil dayon kini sa duha ka lalaki nga nag-atang na daan.

Matud sa maong polis nga ang manghud lalaki kinsa nag-una og pipila ka metros gikan sa nahimutangan sa biktima, nakalingi sa pagbuto-buto sa armas ug nakakita nga duha ka lalaki ang nagtabang og pusil sa iyang maguwang.

Apan wala maka-klaro sa mga dagway sa mamumuno ang manghud sanglit nikaratil siya pagdagan palayo dihang gipusil na ang iyang maguwang.

Nakaangkon og duha ka samad pinusilan sa iyang likod, duha sa dughan ug usa sa ulo ang biktima.

Sa paghiling sa kapolisan sa patay’ng lawas sa biktima, ilang napalgan ang usa ka magazine sa kalibre .45 nga adunay sulod nga upat ka bala apan wala’y armas.

Wala na sab makit-i ang mga kabhang sa bala sa lugar nga gihitaboan sa krimen sanglit gabii ug ngitngit na nakaabot ang mga polis sa maong bukirang barangay ug gibundakan pa gyud kini og kusog nga uwan.

Gibutyag ni Olores nga kaniadto daghan nang nireklamo nga mangawat sa maong barangay ang biktima hinungdan nga usa kini sa ilang gitan-aw nga anggulo.

“Wala ni siya sa drug watch list. Wala siya nakasohan sa una og pangawat kay menor de edad pa man siya atong higayona. Kadtong nangreklamo niya, igo ra magpa-blotter, di na mopasaka og kaso,” matud ni Olores.

Padayon pa ang imbestigasyon sa kaso samtang nagpaabot pa ang polis kon kinsa pa ang motug-ang nakasaksi sa krimen. Si Olores niingon nga nakig-coordinate pa sila sa laing mga estasyonan sa polis kon aduna bay nadakpang nagdala og armas atol sa pagpatuman sa gun ban.

Nagsugod ang COMELEC gun ban sa tibuok nasud niadtong Sabado sa samang adlaw nga nahitabo ang pagpusil kang Secusan ug hangtud na kini sa adlaw sa piniliay sa Barangay ug Sangguniang Kabataan karong Mayo 14. (BANAT NEWS)