Konseho naningil bahin sa programa sa basura
CEBU, Philippines — Gipaduso og report sa konseho sa Dakbayan sa Sugbo ang Department of Public Services bahin sa kalambuan sa implimentasyon sa Basura Mo, Sardinas Ko sa kasamtangang administrasyon.
Kini human ang ubang miyembro sa Konseho mi-aprubar sa resolusyon nga gipangamahanan ni Konsehal Jocelyn Pesquera sa regular session niadtong Abril 3 ning tuiga nga nangayo og update sa programa.
Buot masayran sa konseho kon pila ka lata sa sardinas ang nahatag ngadto sa mga residente sa Barangay Lahug ug Cogon Pardo nga nahimong pilot area sa programa diin ang basura ilisan og sardinans kon kini adto na ilabay sa compactor trucks sa siyudad.
Usa ka plastic sa basura bayluan og usa ka lata sa sardinas samtang ang usa ka sako sa basura bayluan og duha ka latang sardinas.
Ang kagamhanan sa siyudad nakapalit og sardinas nga nagkantidad og P5 million gamit ang pundo sa Accelerated Social Amelioration Program (ASAP) funds.
Ang programa gilusad sa administrasyon karon niadtong Enero 2017 nga gisugdan diha sa maong duha ka barangay.
Si Mayor Tomas Osmeña mipili sa Lahug ug Cogon Pardo tungod kay kini ang hotspot area sa siyudad nga daghan og basura nga gilabay sa kanal o kaha kasapaan.
Ang Assistant Head sa DPS John Paul Gelasque miingon malampuson ang programa ug motuman usab sila sa mando sa konseho. (BANAT NEWS)
- Latest
