Moagi sa Manipis road gipahimangnuan

CEBU, Philippines — Maagian na ang karsada sa Barangay Manipis, Siyudad sa Talisay, apan dili gihapon kini kakumpyansahan kay dili pa lig-on ang kahimtang niini.

Si Alvin Santillana, pangulo sa City Disaster Risk Reduction and Management Office (CDRRMO) sa dakbayan miingon nga wala gyud maagii ang maong dalan gumikan sa sunod-sunod nga landslide sa may Sitio Languyon niadto pang adlaw nga Domingo.

Tungod sa maong hitabo, gipaagi una ang mga motorista sa Uling-Naga Road samtang gihawanan ang midahiling yuta nga napatunga sa mga heavy equipment nga iya sa QM Builders.

Hinoon si Santillana mipahibawo nga sugod kagahapon, mahimo nang maagian ang Manipis apan kinahanglan gyud mag-amping ang mga motorista kay dili stable ang yuta sa lugar. Asoy pa niya nga bisan og walay uwan, naa gihapoy yuta nga humok gumikan sa nagtubod nga tubig sa ibabaw nga bahin.

Matud ni Santillana nga kon mabati sa motorista nga adunay naglagubo sa ibabaw nga bahin, dili na lang gyud molahos sa pag-agi aron luwas sa disgrasya ilabi na nga adunay pagtagak-tagak sa gagmay’ng bato sa lugar.

Hinoon walay gikataho nga samaran o nakalas sa nahitabong landslide sa lugar. (DILT) (BANAT NEWS)