Radio frequency sa mga enforcers hiusahon

CEBU, Philippines — Hiusahon ang radio frequency sa mga traffic enforcers sa Probinsiya sa Sugbo aron magamit ang ilang mga radio panahon nga adunay problema sa trapiko.

Ang focal person on traffic management sa Probinsiya sa Sugbo, Jonathan “Joy” Tumulak, nihangyo sa Provincial Disaster Risk Reduction and Management Office (PDRRMO) nga motabang sa pagseguro nga matag local government unit adunay radio nga magamit.

Matud ni Tumulak nga aduna na silay inisyal nga sabot ni Baltazar Tribunalo Jr., pangulo sa PDRRMO, kabahin niini.

“Duna nay existing nga radio karon pero kinahanglan man na nga i-upgrade and then i-check pud sa tanang police stations kung unsay status sa ilang mga radio. Nipasalig to si Sir Baltz nga ilang i-review and then willing sila nga mo-support,” matud ni Tumulak.

Ang pag-usa sa radio frequency importante aron masayud ang ubang lungsod kun adunay kinahanglang respondehan dili lang problema sa trapiko apil na sab sa kalamidad nga mahitabo.

Dugang ni Tumulak nga usa sa tan-awon sa PDRRMO nga dili sab ma “traffic” ang komunikasyon sa maong radyo ug maseguro nga makuha ang mga importante nga mensahe panahon nga adunay emerhensiya. (BANAT NEWS)