Gipasanginlang drug mule gi-acquit

CEBU, Philippines — Ang Regional Trial Court mimando sa pag-release sa usa ka 61-anyos nga gipasanginlang drug mule human gibasura sa korte ang kasong gipasaka batok kaniya.

Si RTC Judge Alexander Acosta sa Branch 9 mibasura sa kasong kalapasan sa Section 11, Article II sa Akta Republika 9165 kun “Comprehensive Dangerous Drug Act” nga gipasaka batok kang Dorotea Ausan  Moyes, lumad nga taga Seriaga, Quezon.

Nasuta sa korte nga walay lig-on nga kamatuoran ang kasong gipasaka batok kang Moyes.

Nunot niini, si Senior Police Officer 3 Darius Dionysius Libanan ang mipasaka sa nahisgutang kaso batok kang Moyes.

Si Libanan mipasangil nga niadtong Enero 27, 2018 sa alas 10:30 sa buntag usa ka security personnel sa usa ka hotel sa dakbayan sa Sugbo ang nangayo og panabang kanila human ang ilang guest nga si Moyes miduol kanila nga naghilak.

Giingong niadtong higayona si Moyes misumbong nga dunay kadudahan nga sulod sa iyang bag ug nasuta nga shabu ang sulod sa bag nga mitimbang ngadto sa 1124.21 grams ug human niadto gisikop dayon si Moyes sa mga polis.

Si Moyes sa iyang testimoniya nagkanayon nga ang maong package gitunol kaniya sa gihinganlan og “Jade” nga gisugo sa iyang higala nga si Andrew Wood kinsa iyahang pakigkitaan unta nganhi sa Sugbo. Si Wood ug Moyes nagkaila diha sa online o internet.

Matud ni Moyes nga wala siya mahimutang sa package nga gitunol kaniya hinungdan nga mitawag siya sa security sa hotel nga iyang giestaran.

Giingong si Moyes gisugo nga dalhon ang maong bag ngadto sa gipuy-an ni Wood sa nasud sa Japan. Giingong gikanselar ni Wood ang ilang panagtagbo nganhi sa Sugbo ug adto na sa Osaka, Japan pakigkitaan niini si  Moyes.

Si Moyes kinsa nagtrabaho isip nurse assistant ngadto sa Australia naabot nganhi sa Sugbo niadtong Enero 24.

Matud ni Acosta nga base sa ebidensiya nga gipresentar, si Moyes matinud-anon kini ug wala kini kalibutan nga shabu ang sulod sa back pack nga gitunol ngadto kaniya. (Gikan sa The Freeman/BDB) (BANAT NEWS)