Krimen sa Central Visayas nikunhod

CEBU, Philippines — Nikunhod og 16.5 porsyento ang total crime volume sa tibuok Central Visayas sa unang quarter karong tuiga sigun sa Police Regional Office-7.

Base sa presentasyon ni Senior Supt. Julian Entoma, hepe sa Planning and Operations Division sa PRO-7 atol sa Regional Peace and Order Council (RPOC) Meeting kagahapon, gikan sa 15,483 nga kaso sa unang quarter sa 2016 nikunhod kini og 10.5 porsyento sa 2017 nga niabot sa 13,864.

Sa tuig 2018, nahimo na lang nga 11,574 ang total crime volume sa Central Visayas sa susamang period.

Bisan ang index crimes nikunhod kini sulod sa tulo ka tuig diin gikan sa 4,954 ka kaso sa 2016 niabot na lang kini og 3,596 sa niaging tuig ug karon nikunhod og 36.3 porsyento diin nahimong 2,291 na lang ka kaso.

Ang index crime mao ang murder, homicide, rape, physical injuries, theft o kawat, robbery ug carnapping samtang ang non-index crimes mao usab ang mga kaso o kalapasan batok sa mga special laws sama sa mga ordinansa.

Sa report ni Entoma, 9.6 porsyento sab ang pagkunhod sa non-index crimes sa unang quarter sa 2018 itandi sa susamang period niadtong niaging tuig.

Nagpabilin nga numero uno ang theft o kawat sa labing daghang kaso sa Central Visayas karong tuiga diin 926 ka kaso ang natala, gisundan sa physical injuries nga 601 ka kaso ug robbery nga 328.

Atol sa tigum nitumaw ang pangutana kung nganong walay dakop sa mga mag-inom sa mga pangpublikong lugar bisan sa executive order ni Presidente Rodrigo Duterte.

Matud ni Entoma nga maglisud sila tungod kay ang ubang lugar wala pay ordinansa kabahin niini.

Kasagaran sa mga mag-inom sa adlaw’ng Domingo diin matud ni Entoma nga maoy adlaw nga tinglingaw-lingaw.

Matud ni Entoma nga ang gihimo nila karon mao ang pag-ila sa lugar diin adunay kanunay’ng gubot sama sa mga imnanan nga maoy ilang gibasehan sa pag-deploy sa ilang police personnel. (GMR) (BANAT NEWS)